Libre nga serbisyo sa CCRO

BISAYANG BALITA ‘NI, BAI

Libre nga serbisyo sa CCRO

karong Febrero 27, 2018

 

“Ang atong buhatan sa City Civil Registrar maghatag og libre nga serbisyo sa pag-issue og mga certification sa birth, marriage and death karong Febrero 27, 2018 diin mao kini ang Culmination Day sa Civil Registration Month Celebration.”

Mao kini ang gibutyag ni City Civil Registrar Mr. Noel Managbanag dili pa lamang dugay.

Didto kini ipahigayon sa City Civil Registrar’s Office ‘ning dakbayan nga anaa mahimutang sa Ground Flood sa Baybay City Hall.

Nunot niini, gi-awhag ni Managbanag ang mga Baybayanon nga wala pa makaparehistro sa ilang anak o kadtong mga dugay nang namatyan apan wala pa gihapon nakakuha og death certificate sa pag-adto sa ilang buhatan karong Martes puhon, Febrero 27, aron makapahimulos niining maong libre nga mga serbisyo sa CCRO.

Samtang, atol sa pagpakighinabi kang City Civil Registrar Managbanag iyang gibutyag nga naghatag sila og libre nga Philippine Statistics Authority (PSA) copy sa birth certificates sa mga indigent nga mga kabataan sa mga kabarangayn ‘ning dakbayan.

Matud pa ni Managbanag nga gumikan kini kay maoy gusto ni Baybay City Mayor Carmen L. Cari nga aduna nay PSA-copy sa ilang birth certificates ang tanan nga mga kabataan dinhi sa dakbayan sa Baybay nga motungha sa Grade I.

Nagkanayon si Managbanag nga ang mga Child Development Workers sa mga kabarangayan ang miila kon kinsa sa ilang mga kabataan ang indigent o walay ikagasto ang ginikanan sa pagkuha og PSA-copy sa ilang birth certificates didto sa dakbayan sa Tacloban.

Nasayran nga isumite sa mga Child Development Workers ang maong listahan ngadto sa City Social Welfare and Development Office (CSWDO) kinsa mao ang moluwat og Certificate of Indigency alang sa nahisgotang mga kabataan sa dili pa kini nila isumite ngadto sa CCRO.

Sumala pa sa taho nga ang CCRO ang mosumite sa maong listahan didto sa buhatan sa PSA sa dakbayan sa Tacloban uban sa bayad gikan sa Gender and Development Local Civil Registrar (GAD-LCR) Fund sa Lokal nga Kagamhanan sa dakbayan sa Baybay.

Angayang masayran nga sa miaging tuig 1,747 ka mga kabataan ang nakuhaan og PSA-copy sa ilan birth certificate pinaagi sa CCRO ‘ning dakbayan.

Matud pa usab ni Managbanag nga karong tuiga, migahin og pondo ang Lokal nga Kagamhanan sa dakbayan sa Baybay, pinaagi sa GAD-LCR Fund niini alang sa PSA-copy sa birth certificate sa 1,800 ka mga indigent pupils nga motungha og Grade I.

Angayang masayran nga segun pa sa Philippine Statistics Authority (PSA), nga sa tibuok nasud, bugtong ang Lokal nga Kagamhanan sa dakbayan sa Baybay lang ang naghatag og libre nga PSA-issued birth certificates sa mga indigent pupils nga mosulod og Grade I.

Alang sa dugang kasayuran bisita lang sa City Civil Registrar’s Office nga anaa mahimutang sa Ground Floor sa Baybay City Hall ug pangitaa lang si City Civil Registrar Mr. Noel Managbanag. (Marissa Miguel Cano with reports from Jason Ybañez)

###