Baybay City LGU Magtukod og Permanent Shelter alang sa mga Molupyo sa Barangay Mailhi

“Trabahoon na ‘na nato kay nagkinahanglan na ang DepEd sa ilang iskuwelahan unya nag-antos pud ang mga namuyo sa Evacuation Center.  Dili lalim lagi magpuyo sa Evacuation Center.” Mao kini ang giluwatang pamahayag ni Baybay City Mayor Hon. Jose Carlos L. Cari atol sa labing ulahi nga panagtigom sa mga ginsakopan sa City Inter-Agency Task Force for the Management of Emerging Infectious Diseases (City IATF-MEID).

Matud pa ni Mayor Cari nga gi-aprobahan na sa Sangguniang Panlungsod (SP) ‘ning dakbayan, nga gipangulohan ni Vice Mayor Atty. Ernesto M. Butawan, ang Supplemental Budget No. 2 diin nahilakip ang pondo nga gigahin alang sa pagtukod og napulo (10) ka building nga magsilbing permanent shelter sa mga survivors sa TS Agaton gikan sa Barangay Mailhi ‘ning dakbayan.

Angayang masayran nga atol sa labing ulahing City Development Council (CDC), diin mitambong si Office of Civil Defense Region 8 Regional Director Lord Byron Torrecarion, gi-pesentar ni City Planning and Development Office Head Engr. Patrick Postrero ang plano alang sa nahisgotang permanent shelter nga tukuron sa Lokal ga kagamhanan sa dakbayan sa Byabay didto sa Barangay Higuloan.

Matud pa ni Engr. Postrero nga, “One building is composed of four (4) units, nga adunay floor area nga 32.3 square meters, and each building costs twenty-three million (P2.3M).  Ang matag unit naay comfort room, ceiling, kitchen, doors and windows.” 

Samtang, gibutyag ni City Social Welfare and Development Office (CSWDO) Dr. Manuel Icon Donaire nga, “Sa pagka karon, mouli gihapon sila sa Barangay Mailhi kay manginano sa ilang mga gamit, pananom ug binuhi nga mga hayopan, pero mobalik sila sa Evacuation Center inig ka gabii, anha sila matulog kay naa pa man diha ang ilang pamilya.”

Gi-awhag usab ni Donaire ang kapulisan ‘ning dakabayn nga magbutang og pulis nga permanenteng magbantay, dili lang sa Baybay City Night High School kon dili lakip na usab sa Baybay City Senior High School, aron hugtanon nga ikapatuman ang curfew sa nahisgotang mga Evacuation Centers.

###