Baybay City’s LCE reveals ways to counter the crisis

“Adunay nagsingabot nga krisis, dili lang dinhi dakbayan sa Baybay o sa Pilipinas kon dili lakip na sa tibuok kalibutan gumikan niining padayon nga pagsaka sa presyo sa mga produktong petrolyo.”

Mao kini ang gibutyag ni Baybay City Mayor Hon. Jose Carlos L. Cari sa atubangan sa mga bag-ong local officials ug mga kawani sa Lokal nga Kagamhanan sa dakbayan sa Baybay atol sa gipahigayon nga Flag Raising kagahapon.

Matud pa ni Mayor Cari nga, “Okay ra ‘ta nganhi sa probinsya kay naa man ‘tay mga yuta nga matikad ug mga programa nga ikapatuman alang sa mga mag-uuma ug mga mananagat.

Gipasabot ni Mayor Cari nga gumikan sa krisis, gibanabana nga baynte singko porsiyento (25%) sa mga micro, small & medium enterprises (MSMEs) dinhi sa nasud ang magtak-op sa ilang patigayon. Mo-ukyo ang ekonomiya sa atong nasud ug ang pagkaon ang labing maapektuhan niining maong hitabo.

Hinuon, matud pa ni Mayor Cari nga wala siya mibati og kabalaka dinhi sa dakbayan sa Baybay, “Kay dako na ang agi sa atong pagserbisyo. Napalapad nato ang atong pagserbisyo bisan pa sa panahon sa pandemya, atong napalapad ang serbisyo sa panglawas, sa engineering, sa atong social services, naka-response usab kita sa ubang lugar sa panahon sa katalagman. Ang tanan nga ahensiya nakatubag ug nagtrabaho sa inyong mandato ug akong dakong pasalamat nga ato kining nahatag nga tanan ngadto sa mga katawhan.”

Apan matud pa ni Mayor Cari nga doble pa niini nga matang sa pagserbisyo ang iyang gilauman niining mosunod nga tulo ka tuig gumikan sa nagsingabot nga krisis.  Matud pa niya, “Atong atubangon ang krisis pinaagi sa dugang lihok, dugang nga panahon ug pag-amping sa atong salapi dinhi sa siyudad sa Baybay diin ang angay lang ang gamitan ug ang angay lang nga serbisyo ang atong ipadagan.”

###