Pormal na nga gilunsad ang Baking and Pastry House sa Monterico Farmers Association (MoFA) atol sa gipahigayon nga Monterico Farmers’ Day dili pa lamang dugay (Hulyo 5, 2022). Gitambungan kining maong kalihokan nilang Sangguniang Panlungsod Members Hon. Romulo Alcala, ug Hon. Jorge Rebucas, City Agriculturist Ms. Mora Abarquez, City Agriculture Office (CAO) Consultant for Fisheries Ms. Elena Siddiqui, ug Monterico Barangay Captain Hon. Melchor Sabal.
Matud pa ni MoFA President Jessie Abenoja nga dako ang ikatabang niining maong project kanila tungod kay makahatag kini og dugang tinubdan sa kapanginabuhi-an, ilabi na sa mga kababayen-an sa Barangay Monterico.
Angayang masayran nga atol sa iyang pagpakigpulong, sa 15th Charter Day Celebration ‘ning dakbayan, nagkanayon si City Mayor Hon. Jose Carlos L. Cari nga kinahanglan nga i-andam ang mga Baybayanon sa nagsingabot nga krisis pinaagi sa pagbansay-bansay kanila aron sila makabaton og dugang kaalam, “Tagaan nato og dugang abilidad ang tanan nga mga katawhan sa atong siyudad, hatagan ‘sab nato sila sa mga kagamitan nga ilang gikinahanglan.”
Nagkanayon si Mayor Cari nga gumikan sa walay puas nga pagsaka sa presyo sa mga produktong petrolyo, posibleng makasinati og krisis sa pagkaon, dili lang ang Pilipinas kon dili ang tibuok kalibutan, ilabi na kon magsira na ang mga gagmay’ng patigayon dinhi’s nasud gumikan sa gimando nga pagpasaka sa suholan sa mga trabahante. “Busa, isip pagpangandam niini nga suliran, i-capacitate ‘ta daan ang atong mga katawhan,” dugang pa ni Mayor Cari.
Nunot niini, gibutyag ni Mayor Cari nga dako nga pondo ang gigahin karong tuiga alang sa mga katawhan, ilabi na sa mga mag-uuma ug mga mananagat, aron kahatagan sila og dugang abilidad.
###