“Walay makatubag sa pangutana kon mao na ‘ni ang new normal o ang kinahanglan natong maandan. Didto sa gawas sa nasud, pag-update sa bakuna ang ilang gitutukan. Kita, ang mahimo lang nato mao ang maghulat ug mangandam.”
Mao kini ang giluwatan nga pamahayag ni Baybay City Mayor Hon. Jose Carlos L. Cari atol sa iyang pagpakigpulong sa 15th Charter Day Celebration sa dakbayan sa Baybay.
Matud pa ni Mayor Cari nga walay nasayod kon naay ma-develop nga variant nga mas grabe pa kaysa Omicron hinungdan nga mao kini ang angayan nga pangandaman sa dakbayan sa Baybay. Matud pa niya nga, “Dili ‘ta mag-ampo nga muabot ‘na. Hinuon, mag-ampo ‘ta nga dili ‘na muabot. Pero, kon muabot ‘na nga higayon, kinahanglan nga andam ‘ta.”
Nunot niini, gibutyag ni Mayor Cari nga usa ang pagpangandam batok sa COVID-19 sa mga hatagan og gibug-aton sa pangagamhanan sa dakbayan sa Baybay. Haum kaayo kini sa mando ni President Ferdinand “Bongbong” Marcos Jr. nga kinahanglan nga sulod sa first 100 days sa iyang pangagamhanan, kinahanglan nga 90% sa mga senior citizens ang nabakunahan ug 50% sa mga fully vaccinated ang nakapa-booster dose na.
Angayang masayran nga gibutyag ni Medical Officer V Dr. Jerome Profetana, sa City Health Office (CHO) ‘ning dakbayan ng sa pagtapos sa vaccination sa miaging semana, sobra na (86,036) sa target population nga 84,440 and nabakunahan na sa Local Vaccination Operation Center (ELVOC). Matud pa usab ni Dr. Profetana nga 74% sa mga 5-11 years old children, 128% sa mga 12-17 years old, 108% sa mga 18-59 years old, ug 79% sa mga senior citizens (60 years old and above) ang nabakunahan na. Hinuon, mipadayag siya sa kabalaka nga 11% pa lang sa target population sa dakbayan sa Baybay ang nagpa-booster dose na.
Tungod sa mando ni Presidente Marcos, kapin pa sa usa ka libo (1,028) pa ka mga senior citizens ang kinahanglan nga ma-fully vaccinated; samtang 39,000 pa ka mga Baybayanon ang kinahanglan nga mabakunahan og booster dose.
Samtang, padayon nga nag-awhag ang City Inter-Agency Task Gorce on the Management of Emerging Infectious Diseases (City IATF-MEID) nga mosunod gayud ang mga Baybayanon sa mga health protocols ug dili gayud mokumpiyansa tungod kay anaa pa ang virus dinhi sa sa dakbayan sa Baybay.
Angayang masayran nga pila na ka semana nga wala nay positibo nga kaso sa COVID-19 dinhi sa dakbayan sa Baybay. Apan kagahapon (Hulyo 27, 2022) sa alas cuatro sa hapon, gibutyag ni Surveillance Officer Nurse Kristine Shayne Abarquez Castos nga aduna na usab kita’y usa (1) ka CONFIRMED ACTIVE COVID-19 CASE ug usa (1) ka ACTIVE PROBABLE COVID-19 CASE nga pulos mga Local Index Case (LIC) o walay record sa pagbiyahe gawas sa dakbayan. (Marissa Miguel Cano, City Information Officer, Baybay City, Leyte)
###