Konsultasyon ang usa sa mga labing epektibo nga pamaagi sa Lokal nga Kagamhanan sa dakbayan sa Baybay aron masuta ang panginahanglanon sa mga molupyo sa usa ka barangay. Ug didto sa Barangay Balao ‘ning dakbayan, kapanginabuhi-an sa mga kababayen-an nga antigong manahi ang usa sa mga mitumaw nga mga panginahanglanon tungod kay aduna silaý kaalam apan wala silaý sewing machines o makina. Dili pa lang dugay, natuman kining maong pangandoy tungod kay gi-turnover sa Baybay City LGU ngadto sa barangay ang dose (12) ka mga units sa sewing machines uban sa mga panapton nga ilang magamit sa pagsugod sa pagpanahi.
Atol sa iyang pagpakigpulong, gipasalamatan og dako ni Punong Barangay Mercedes Yap ang Baybay City LGU sa tanan nga mga programa ug mga proyekto nga gihatag kanila sa Baybay City LGU, ilabi na sa mga sewing machines diin matud pa niya nga dili na kinahanglan pang mangagalon ang mga nanay didto sa poblacion tungod kay aduna na silaý kapanginabuhi-an karon.
Nunot niini, gi-awhag ni Baybay City Vice Mayor Atty. Ernesto M. Butawan ang mga kababayen-an sa Barangay Balao nga ila kining ampingan aron dugay kini nilang magamit ug magsilbing dugang tinubdan sa kapanginabuhi-an sa mga miyembro sa Barangay Balao. Matud pa usab niya nga palaran ang mga molupyo sa dakbayan sa Baybay kay nakabaton og mga lider nga antigong motan-aw sa panginahanglanon sa mga katawhan. Busa, matud pa ni Vice Mayor Butawan nga siyento porsiyentong gisuportahan sa Sangguniang Panlungsod ang mga proyekto ni Mayor Cari tungod kay nakatabang kini sa adlaw-adlaw nga pangiabuhi sa mga Baybayanon.
Sa iyang kabahin nagkanayon si Mayor Cari nga usa lang ang maong livelihood sa mga kababayen-an sa mga butang nga gihisgotan atol sa gihimo nga Barangayan sa Barangay Balao diin gihisgotan ang mga panginahanglanon dili lang sa barangay, kon dili lakip na usab sa iskuwelahan sa barangay.
Apan matud pa ni Mayor Cari nga kinahanglan nga ilang ayuhon ang ilang produkto aron dili sila maglisod pa sa pagbaligya niini, “Puhon, makahatag mo og butang ngadto sa uban pinaagi sa Baybay City LGU. Ang uban usab nga mga tawo, sa ubang mga lugar, kon makakita sa inyong maayo nga produkto mopalit usab niini ug maila na unya ang Barangay Balao tungod sa inyong de kalidad nga mga bag.”
Sa katapusan, nagkanayon si Mayor Cari nga, “Salig lang mo nga ang tanan nga mga programa sa siyudad sa Baybay gihunahuna pag-ayo, gi-implementar sa ensakto ug giseguro nga maabot gayud ngadto sa mga kabarangayan.”(Marissa Miguel Cano, City Information Officer, Baybay City, Leyte)
###