Pinaka-ubos ang gidaghanon sa mga drug-affected barangays dinhi sa Rehiyon Otso. Mao kini ang gibutyag ni Philippine Drug Enforcement Agency (PDEA) Region 8 Regional Director Edgar T. Jubay atol sa gipahigayon nga labing una nga film showing sa Buy-bust Queen, usa ka anti-illegal drugs advocacy film nga gi-produce ni Film Director Jr Olinares ubos sa Pinoyflix uban sa PDEA.
Matud pa ni Director Jubay nga sa 2,900 ka mga drug-affected barangays dinhi sa Rehiyon Otso, 206 nalang ang nagpabilin pa nga drug-affected apan nanganti siya nga ilang i-clear ang nahigsotang mga barangay sa dili pa matapos ang tuig 2022.
Hinuon, matud pa niya nga samtang ilang gi-clear ang mga affected barangays, kinahanglan nga magpabilin usab nga drug-cleared ang 2,694, ilabi na ang mga unaffected barangays sa matag lugar dinhi sa Rehiyon Otso. Tungod niini, gikinahanglan ang malahutayon nga adbokasiya batok sa iligal nga druga ug magamit sa maong katuyu-an ang Buy-bust Queen Movie. Gumikan kini kay makita sa maong salida ang sakripisyo nga gihimo sa mga law enforcement agencies aron lang mapakgang ang iligal nga druga sa nasud, ingon man usab kon unsa ang mahimong dangatan sa mga tawo nga mosulod niining maong bisyo.
Gibutyag usab ni Director Jubay nga gumikan sa gipakita nga suporta sa Baybay City LGU sa mga kalihokan sa PDEA batok sa iligal nga druga, mas nadasig sila aron mas hugtan pa ang ilang gihimo nga paggukod sa mga migamit ug namaligya og iligal nga druga dinhi sa Rehiyon Otso.
Sa kabahin sa Baybay City LGU, gibutyag ni Vice Mayor Atty. Ernesto M. Butawan nga kanunay gayud nga nagsuporta ang Baybay City LGU sa kampanya batok sa iligal nga druga, “Dili magpanuko ang atong gobyerno sa paggukod sa mga kriminal apan aduna usab kita’y gobyerno nga andam nga motabang sa mga gusto nang mobalik sa sabakan sa atong komunidad hinungdan nga aduna kita’y Balay Silangan.” Hinuon, matud pa ni Vice Mayor Butawan nga gikinahanglan ang hiniusang pwersa, dili lang sa mga law enforcement agencies ug sa gobyerno kon dili lakip na sa katilingban, sa mga ginikanan, ilabi na sa mga kabataan, aron hingpit nang mawala ang iligal nga druga sa atong tagsa-tagsa ka mga komunidad.
Sa laing bahin, malaomon si Direk Jr Olinares nga i-promote sa mga kabataan ang Buy-bust Queen aron mas daghan ang makakita niini ug maka-amgo nga dili sila angayan nga mosulod niining maong bisyo. Iya usab nga gidasig ang mga Baybayanons nga i-like ang PinoyFlix aron sila makakita og mga salida nga libre, sama sa Buy-bust Queen. (Marissa M. Cano, City Information Officer, Baybay City, Leyte)
###