“Tungod sa kalisod sa ekonomiya karon, tabangi ‘sab ang inyong kaugalingon. Kon sa una, mo-inom ‘ta, magsugal ug manigarilyo, ato usang putlon ang atong mga bisyo ug unahon nato ang atong pamilya, ilabi na kon naa ‘tay mga anak.”
Mao kini ang gipalanog ni City Vice Mayor Atty. Ernesto M. Butawan atubangan sa mga transport groups ‘ning dakbayan sa wala pa sugdi ang distribution of food packs sa miaging Sabado (Septiyembre 10, 2022).
Matud pa ni Vice Mayor Butawan nga kinahanglan nga hatagan og dako nga pagtagad sa mga ginikanan ang pag-iskuwela sa ilang mga anak, ilabi na karon nga libre na ang pag-iskuwela sa elementary, sa high school ug sa college. “Wala nay rason kon nganong dili pa maka-iskuwela ang atong mga anak, ilabi na nga may gitanyag usab nga scholarship ang Baybay City LGU,” dugang pa ni Vice Mayor Butawan.
Atol sa maong kalihokan gibutyag usab ni Vice Mayor Butawan nga aduna nay MRI Scanner ug Ultra Sound sa bag-ong ospital karon ug nga sa dili madugay muabot na ‘sab ang CT Scan. Apan gumikan sa kamahal niini nga kahimanan (P50M) ug sa kadako sa galastuhan kay 24 oras man ang air conditioning niini, may balayranan ang mga mogamit niini apan himuan pa kini og ordinansa sa Sangguniang Panlungsod ‘ning dakbayan.
Gipasabot usab niya nga nag-Ground-breaking Ceremony na sa tukuron nga Super Health Center sa nahimutangan sa daan nga ospital aron kahatagan og mas maayong serbisyo sa panglawas ang mga Baybayanon ug ang mga molupyo sa kasikbit nga mga lungsod. Kini tungod kay ibutang na sa usa ka lugar ang tanan nga primary health care facilities sa dakbayan – Pharmacy, Clinical Laboratory, Birthing Facility, Dental Facility ug Blood Collecting Unit, kon itugot kini sa Department of Health (DOH).
Nunot niini, matud pa ni Vice Mayor Butawan nga kon nanginano ang gobyerno sa kaayuhan sa ilang tagsa-tagsa ka mga pamilya, pinaagi sa mga gihan-ay ngamga programa ug serbisyo sa dakbayan, mas kinahanglan nga ila kining buhaton.
Nagkanayon usab ni Atty. Butawan nga nasayod ang Lokal nga Kagamhanan sa dakbayan sa Baybay nga dili paigo ang gihatag nga food packs kanila matag tulo ka bulan, “Apan maayo nalang kini aron maka-iban sa inyong kalisdanan kay maoy tinguha sa atong lungsod nga kon naa may inyong ibayad nga buhis sa atong gobyerno, amo ‘ning ibalik pinaagi sa mga programa, serbisyo, ug mga ayuda.” (Marissa M. Cano, City Information Officer, Baybay City, Leyte)
###