Giawhag sa City Traffic Management and Terminal Office (CTMTO) sa Lokal nga Kagamhanan sa dakbayan sa Baybay ang mga tag-iya sa mga tricycle sa pag-renew na sa ilang franchise.
Mao kini ang gibutyag ni CTMTO Head Mr. Jerson Colocar atol sa pagpakihinabi kaniya sa tulumanon, “Nasayod ka ba, Bai?” nga mabati matag adlaw’ng Martes, Huwebes ug Sabado, alas onse sa buntag hangtud sa alas dose sa udto, sa 92.5 Groove FM.
Matud pa ni Colocar nga sa miaging tuig nueve siyentos otsenta y dos (982) ka mga franchise sa tricycle ang na-renew sa ilang buhatan.
Niining maong gidaghanon, duolan sa duha gatos (186, puti) ka mga tricycle nga nagbiyahe-an sa North District ang na-renew ang franchise; kinyentos baynte (520, yellow) sa mga nagbiyahe-an sa Downtown Area; duolan sa dos cientos (175, blue) sa mga nagbiyahe-an sa South District; ug kapin sa usa ka gatos (108, red) sa mga nagbiyahe-an sa East District.
Apan atol sa pagpakighinabi kang Colocar, iyang gibutyag nga sa pagka karon (Febrero 6, 2023), siyento traynta y seis (136) pa lang mga mga franchise ang na-renew sa ilang buhatan sa kapin sa usa ka libo (1,012) ka mga tricycle ‘ning dakbayan.
Niining maong gidaghanon, baynte nueve (29) ang nagbiyahe-an sa North District, saysente y seis (66) sa Downtown Area, kinse (15) sa East District ug baynte seis sa South District.
Nunot niini, iyang gi-awhag ang mga operators sa pag-renew na sa franchise sa ilang mga tricycle sa labing dali nga panahon.
Matud pa ni Colocar nga kinahanglan nga ma-inspect usa sa ilang buhatan ang body color, body number ug yellow plate sa matag tricycle sa dili pa sila mo-issue og franchise ug aron pagseguro nga anaa pa sa kondisyon ang tricycle. Kinahanglan usab nga motambong sa ilang gipahigayon nga seminar matag adlaw’ng Sabado ang mga drivers sa dili pa sila mahatagan og Updated driver’s ID sa CTMTO.
Nagkanayon usab si Colocar ang gikinahanglan nga kumpleto na ang mga dokumento inig adto nila sa CTMTO aron dili na sila malangan o magbalik-balik pa.
Gilangkoban kini sa Certificate of Motorcycle Registration ug Official Receipt of Registration gikan sa Land Transportation Office (LTO), BIR Form 0605 ug 2551Q (with OR), picture sa motorsiklo ug sa sidecar, barangay clearance, sedula ug bayad nga P850.00.
Kahinumdoman nga atol sa panagtigom nga gipahigayon ni City Mayor Hon. Jose Carlos Cari uban sa mga tricycle drivers and operators ‘ning dakbayan, usa ang pagpakunhod sa balayranan sa renewal of franchise sa ilang mga gipangayo kaniya.
Nunot niini, gi-amiyendahan ang ordinansa nga gipatuman ‘ning dakbayan ug gikan sa daan nga mil siyete siyentos pesos (P1,700.00) matag usa ka tricycle, otso siyentos singkuwenta pesos (P850.00) nalang ang balayronon sa renewal of franchise sa matag tricycle ‘ning dakbayan.
Nunot niini, mapasalamaton ang mga operators ngadto sa Lokal nga Kagamhanan sa dakbayan sa Baybay gumikan sa ilang makanunayon nga pagsanong sa ilang mga hangyo.
Hinuon, matud pa ni Mayor Cari nga matinud-anon nga pagserbisyo lamang ngadto sa ilang mga pasahero ang gipangayo nga bugti sa gihimo nga pagpangga sa Lokal nga Kagamhanan sa dakbayan sa Baybay ngadto sa transport sector ‘ning dakbayan.
Samtang, gibutyag ni Colocar nga nangandam na ang ilang buhatan alang sa ayuda nga ihatag sa Lokal nga Kagamhanan sa dakbayan sa Baybay sa mga transport groups ‘ning dakbayan alang sa First Quarter sa tuig 2023. Gitataw usab niya nga dili makadawat og ayuda ang mga drivers nga dili updated ang Driver’s ID.
Alang sa dugang kasayuran bisita lang sa buhatan sa City Traffic Management ang Terminal Office ‘ning dakbayan nga anaa mahimutang sa Basement sa New City Hall, Diversion Road, Barangay Gaas ‘ning dakbayan o sa CTMTO Sub-Office nga anaa mahimutang sa atubangan nga bahin sa Baybay City Gym. (Marissa Miguel Cano, City Information Officer III, Baybay City, Leyte)
###