Kinse (15) ka mga Pantawid Pamilyang Pilipino Program (4Ps) beneficiaries dinhi sa dakbayan sa Baybay ang mi-graduate na sa programa tungod kay arang-arang na ang kahimtang sa ilang pamilya ug makabarog na sila sa ilang kaugalingon.
Niining maong gidaghanon, tulo (3) ang taga-Barangay Ampihanon, duha (2) ang taga-Barangay Mapgap, ug usa (1) ang taga-Barangay Patag, Barangay Biasong, Barangay Kilim, Barangay Poblacion Zone 21, Barangay Ambacan, Barangay Balao, Barangay Hilapnitan, Barangay Makinhas ug Barangay Mapgap.
Mao kini ang gibutyag ni City Link Virginia Pacurib sa Department of Social Welfare and Development (DSWD) Region 8 sa tulumanon “Nasayod ka ba, Bai?” Programa kini sa Lokal nga Kagamhanan sa dakbayan sa Baybay nga mabati matag adlaw’ng Martes, Huwebes ug Sabado sa alas onse sa buntag hangtud sa alas dose sa udto.
Matud pa ni Pacurib nga regular ang ilang gipahigayon nga monitoring sa mga 4Ps beneficiaries aron pagseguro nga nagsunod sila sa mga kondisyon nga ilang gilagdaan isip 4Ps beneficiaries. Gilangkoban kini sa pagseguro nga nag-iskuwela ang ilang anak, nga gipatambalan kini kon masakit, nga gi-atiman ang ilang pagkaon ug nga dili gamiton sa bisyo ang kuwarta nga ilang gidawat gikan sa gobyerno sama sa pagsugal ug pag-inom og ilimnong makahubog, ug uban pa.
Gibutyag ni Pacurib nga segun sa ilang gihimo nga monitoring and evaluation sa nahisgotang kinse (15) ka mga 4Ps beneficiaries, may kaugalingon na sila nga negosyo o may trabaho na hinungdan nga kaya na nilang ihatag ang panginahanglanon sa ilang pamilya bisan kon wala sa sila niining maong programa sa gobyerno. Nunot niini, dako ang ilang pasalamat sa gihatag nga tabang sa gobyenro sa ilang pamilya sulod sa pipila ka mga katuigan.
Ayangang masayran nga aduna pay 4,515 ka mga 4Ps beneficiaries dinhi sa dakbayan sa Baybay apan 497 kanila ang gikatahong candidate for exit na. Kini tungod kay segun sa gihimo nga National Housing Tageting System (NHTS) Survey sa mga kawani sa DSWD Central Office, nahilakip na sila sa Non-poor Category.
Matud pa ni Pacurib nga ang resulta sa gihimo nga NHTS Survey sa mga tinugyanan sa DSWD Central Office ang ilang basehan sa paghimo sa NHTS Listahanan. Kini nagpasabot nga dili mahimong mag-apply ang usa ka tawo aron mahimong 4Ps tungod kay base sa resulta sa ilang gihimo nga survey, mohatag sila og potential list of additional 4Ps beneficiaries sa matag lugar.
Angayang masayran nga adunay gihatag nga potential list of 4Ps beneficiaries nga 1,175 ang DSWD Central Office alang sa dakbayan sa Baybay ug nga ipahigayon karong buwana ang ilang registration and evaluation of documents. (Marissa M. Cano, City Information Officer, Baybay City, Leyte)
###