Vendors ID sa Tabo-an sa Baybay ilisan sa City Agriculture Office ‘ning dakbayan

Ang mga mag-uuma lang nga taga-dakbayan sa Baybay ang tugotan nga mamaligya sa ilang mga produkto sa Tabo-an sa Baybay ‘ning dakbayan, nga mas nailhan sa tawag nga Kadiwa Center.

Mao kini ang gitataw ni City Agriculturist Ms. Mora Capangpangan Abarquez dili pa lamang dugay.

Atol sa pagpakighinabi kaniya sa “Nasayod ka ba, Bai?” News Team, gibutyag ni Abarquez nga gipatawag sa Sangguniang Panlungsod (SP) Committee on Agriculture ang mga nanindahay sa  Tabo-an sa Baybay tungod sa mga reklamo nga adunay namaligya didto sa tabo-an nga dili taga-dakbayan sa Baybay. Nasayran nga aduna ‘say uban nga namaligya didto og mga produkto nga ila ra usab gi-angkat gikan sa mga mag-uuma sa laing lugar.

Matud pa usab ni Abarquez nga ilang nasayran nga adunay naghimo-himo og Vendor’s ID pinaagi sa pag-photocopy sa Vendor’s ID nga gi-issue sa City Agriculture Office (CAO) kanila.

Tungod niini, gikuha sa CAO ang mga Vendor’s ID nga ilang giluwatan ug makakuha lang og Tabo-an sa Baybay Vendor’s ID ang usa ka mag-uuma kon makahatag siya og barangay certification nga magmatuod nga usa siya ka mag-uuma sa ilang barangay.

Segun usab sa gikasabutan sa maong meeting nga kinahanglan nga nakabutang sa maong barangay certification kon unsa ang mga utanon nga iyang gitanom ug kon kanus-a ang schedule sa pag-harvest niini.

Pinaagi niini maseguro nga mga molupyo lang sa dakbayan sa Baybay ang makapamaligya sa ilang mga produkto sa Tabo-an sa Baybay ug nga ila ra usab nga abot ang mga produkto sa uma nga ilang gibaligya.

Matud pa ni Ms. Abarquez nga kinahanglan nga dalhon sa mag-uuma ang nahisgotang barangay certificate didto sa City Agriculture Office sa Second Floor sa New Baybay City Hall aron mahatagan sila og Tabo-an sa Baybay Vendor’s ID nga aduna nay numero aron pagseguro nga kalikayan ang pagpakopya niini pag-usab.

Hinuon, gitataw ni Ms. Abarquez nga kada unom (6) ka bulan i-renew ang Tabo-an sa Baybay Vendor’s ID. Matud pa usab niya nga inspeksiyonon usa sa mga kawani sa City Agriculture Office ang umahan sa usa ka mag-uuma sa dili pa siya hatagan sa Tabo-an sa Baybay Vendor’s ID.

Nasayran nga gikasabutan usab sa maong meeting nga 1m x 2m lang ang sukod sa puwesto sa matag manindahay sa tabo-an ug nga dili na puwede nga maghikyad sila sa mga produkto sa uma sa semento didto sa tabo-an.

Kahinumdoman nga gumikan sa pandemya ug sa mga bagyo nga miingo sa dakbayan sa Baybay, nagnihit ang mga produkto sa uma ug misaka pag-ayo ang presyo niini sa merkado ‘ning dakbayan gumikan kay gi-angkat pa man kini gikan sa nagkalain-lain nga mga lugar.

Tungod niini, mihangyo ang Lokal nga Kagamhanan sa Department of Agriculture Regional Office 8 nga ipadala dinhi sa dakbayan sa Baybay ang Kadiwa Center aron makahatag og alternative market sa mga molupyo ‘ning dakbayan.

Unang mi-anhi ang Kadiwa Center kaniadtong Enero 12, 2022 ug mibalhin na sa Maasin City kaniadtong Marso 2, 2022 human masuta nga kaya na sa mga mag-uuma sa dakbayan sa Baybay ang pagmaligya sa ilang kaugalingon nga mga produkto didto sa Tabo-an sa Baybay. (Marissa Miguel Cano, City Information Officer, Baybay City, Leyte)

###