Bisayang Balita Ni, Bai

Enero 5, 2017

Plitehan sa tricycle sa poblacion ‘ning dakbayan sa Baybay siyete pesos na sugod karong Enero 1, 2017.

Mao kini ang gibutyag ni Traffic Enforcers’ In-charge Mr. Arnel Galano sa Bus Terminal and Traffic Management Office (BTTMO) ‘ning dakbayan sa Baybay.

Atol sa pagpakighinabi kang Galano, iyang gisaysay nga pinasikad sa Ordinance #7, Series of 2015, seis pesos (Php6.00) na ang minimum fare sa mga tricycle ‘ning dakbayan.

Apan gilatid sa resolusyon nga giluwatan sa Sangguniang Panlungsod ‘ning dakbayan nga sugod sa Enero 1, 2017 i-implementar na ang dugang piso sa gikatakdang minimum fare sa mga tricycle nga nagbiyahe-an sa poblacion ‘ning dakbayan.

Tungod niini, siyete pesos (Php7.00) na ang minimum fare sa mga tricycle nga nagbiyahe-an sa poblacion ‘ning dakbayan sugod karong tuiga.

Hinuon, gitataw ni Galano nga walay labot niining maong ordinansa ang plitehan sa mga potpot.

Kini tungod kay matud pa ni Galano nga wala man naghimo og resolusyon ang mga potpot drivers kabahin sa pagpasaka sa plitehan sa potpot ‘ning dakbayan.

Hiungdan nga nagpabilin nga singko pesos (Php5.00) ang plitehan sa potpot dinhi sa dakbayan sa Baybay.

Matud pa ni Galano, “Kon adunay maningil ninyo og sobra, kuhaa ninyo ang number ug i-report namo kay bawal na sila manukot og sobra sa singko pesos.”

 Hinuon, matud pa ni Galano nga depende sa kabubut-on sa pasahero, mahimo siyang mohatag og plite nga labaw pa niini, “Kon inyong kinasing-kasing kon pila ang inyong ihatag sa potpot driver pero ang minimum fare nato sa potpot singko pesos ra g’yud.”

Alang sa dugang kasayuran, bisita lang buhatan sa Bus Terminal and Traffic Management Office (BTTMO) nga anaa mahimutang sa likod sa Baybay City Gym ug pangita-a lang si Mr. Arnel Galano.

###

Disyembre 3, 2016

Gisaulog karong tuiga ang ika-singkwenta y uno (51^st) nga anibersaryo sa Baybay Vendors Market Association (BAMAVA) dili pa lamang dugay.

Gipangulohan ang maong kasaulogan sa mga Key Officers ug Section Chairpersons sa BAMAVA ubos sa pagdumala ni BAMAVA President Romulo Alcala.

Gitambungan kini sa mga kadagkuan sa Lokal nga Kagamhanan sa dakbayan sa Baybay nga gipangulohan nilang City Mayor Carmen Cari ug Vice Mayor Michael Cari.

Nasayran nga gitambungan usab kini nilang Sangguniang Panlungsod (SP) Members Hon. Ernesto Butawan, Hon. Arturo Elisa Astorga, Hon. Leoncio Asilom Jr., Hon. Felimon Avila, Hon. Jorge Rebucas, ug sa mga manindahay dinhi sa dakbayan sa Baybay.

Gisugdan ang maong kalihokan sa usa ka parada palibot sa poblacion ‘ning dakbayan uban sa maanindot nga mga floats sa matag section sa merkado publiko ‘ning dakbayan.

Human sa ilang parada, mipatighulog ang mga ginsakopan sa BAMAVA sa Baybay City Gym diin gipahigayon ang usa ka programa atol sa unang adlaw sa bulan sa Disyembre.

Usa sa labing gikahinaman nga parte sa maong programa mao ang Folk Dance Competition nga gisalmotan sa siyam (9) ka mga sections sa BAMAVA.

Gilangkoban kini sa Vegetables/Spices/ Egg Section; Fruit and Root Crops; Rice and Corn with Groceries Section; Fresh Fish Section; Dried Fish Section; Meat Section; Dressed Chicken and Barbecue Section; Baybay Terminal Peddlers Association (BATPA); ug ang Native Delicacies, Charcoal, Tabakoan, Sundangan, and Furniture Section.

Nasayran nga ang Dressed Chicken Section maoy midaog sa Best in Uniform/Best in Costume Category diin nakadawat sila og ganting salapi nga tres mil pesos (Php3,000.00).

Samtang, ang Fruits and Root Crops Section usab ang nakadaog sa Best in Float diin nakadawat usab sila og ganting salapi nga singko mil pesos (Php5, 000.00).

Sa Folk Dance Competition, sa laing bahin, ang Fish Section ang miguwang mananaog diin nakadawat sila og ganting salapi nga syete mil pesos (Php 7, 000.00).

Gikalipay ni Baybay City Mayor Carmen L. Cari ang padayon nga pasuporta sa mga ginsakopan sa BAMAVA sa mga kalihokan dinhi sa dakbayan sa Baybay.

Hinungdan nga karong tuiga, gihatagan sila sa Lokal nga Kagamhanan sa dakbayan sa Baybay og singkuwenta mil pesos nga hinabang pinansiyal alang sa ilang mga kalihokan.

###

Disyembre 3, 2016

Nagpadayon ang nagkalain-laing kalihokan alang sa mga kasamtangang residente sa Baybay City Daytime Therapeutic Community Center ‘ning dakbayan.

Gilangkoban kini sa Morning Meeting, Hygiene Check, Departmental Meeting, ug Job Functions matag buntag ug Interactive Lectures and Psychodrama ug Reflection Writing sa hapon.

Aduna ‘sab sila’y mga Recreational Activities, Sports Activities, Music/Arts/Dance/Remotivational Therapy, ug Spiritual Activities para sa mga residente.

Apan bisan pa niini, gihatagan usab sila og oras sa pagpahulay matag human sa paniudto.

Angayang masayran nga sa noventa y seis ka mga high risk drug dependents ‘ning dakbayan, baynte uno (21) pa lang ang misulod sa Baybay City Daytime Therapeutic Community Center.

Kini tungod kay kadaghanan kanila mao man ang nangita og  kapanginabuhian alang sa ilang pamilya hinungdan nga maglisod sila sa pag-commit sa unom ka bulan ang treatment period sa nahisgotang therapeutic community center.

 Apan sa usa pa lang ka semana nga pagsulod sa nahisgotang therapeutic center ‘ning dakbayan, usa sa mga residente niini ang mibutyag kon unsa kadako ang gikatabang niining maong programa sa iyang kinabuhi.

Matud pa niya nga, “Dako kaayo ang kausaban nga nahitabo sa akong kinabuhi dinhi. Numero uno ang pagdisiplina sa akong kaugalingon kay gitun-an ‘mi dinhi kon unsa ang mga maayong pamaagi.  Nawala ang among mga bisyo sama sa sigarilyo, alkohol, ilabi na ang druga.  Naa mi’y daghan nga mga pamalaud dinhi para sa kaayohan namo.  Unya, mosulod ‘sab ang ALS ug ang TESDA, unya naa pay daghang mga ahensiya sa gobyerno nga motabang kanamo diri.  Dinhi naa mi’y goal o padulngan kay sa unang panahon lun-od na g’yud ang among kinabuhi apan karon nakakita mi’g kahayag nga ingon ani diay ang Day-time Therapeutic Community Center nga motabang diay sa mga drug dependents nga sama namo.”

Nunot niini, iyang gi-awhag ang uban nga mga drug dependents sa pagsulod na sa Daytime Therapeutic Community Center ‘ning dakbayan alang sa ilang kabulahanan, “Sa tanan nga nagagamit pa’g mga druga, pagmata na mo samtang dili pa ulahi ang tanan.  Uban mo diri namo sa Day-time Therapeutic Community Program.  Dinhi makasabot ‘ta kon unsa diay ang mahitabo nato kon magsige ‘ta og gamit og druga.  Dia diri ang atong bag-ong kinabuhi ug ato ‘ning himoon nga goal alang sa kaayohan natong tanan,” dugang pa niya.

Angayang masayran nga sa tibuok nasud, ang dakbayan sa Baybay pa lang ang nag-operate na og Day-time Therapeutic Community Center alang sa mga drug surrenderees.

Anaa kini mahimutang sa New Baybay City Library sa Diversion Road sa Barangay Gaas ‘ning dakbayan.

###

 

Disyembre 3, 2016

Gipanghingusgan karon sa kuwerpo sa kapulisan sa dakbayan sa Baybay ang pagbantay batok sa mga daotang elemento nga posibleng mamiktima sa mga katawhan niining panahon sa Pasko.

Mao kini ang gibutyag ni Chief of Police, PSUPT RAMIL N. AMODIA, sa Baybay City Police Station dili pa lamang dugay.

Matud pa ni Chief Amodia nga mikunhod ang gidaghanon sa mga kaso nga natala sa ilang buhatan karong tuiga kon itandi sa miaging tuig.

Gilangkoban kini sa mga kaso sa pagpangawat, pagpandagmal, pagpanglungkab, disgrasya sa kadalanan, motor napping ug uban pa.

Hinungdan nga ilang paninguhaon nga magpadayon kini, ilabi na karong bulan sa Disyembre diin daghan ang mga kalingawan dinhi sa dakbayan sa Baybay.

Nunot niini, gibutyag ni Chief Amodia nga aron madugangan ang ilang puwersa  sa pagmentinar sa kahusay ug kalinaw ‘ning dakbayan, magpatabang sila sa mga Barangay Tanod nga andam nga mohatag sa ilang serbisyo.

Ila usab nga hangyo-on ang panabang sa mga traffic enforcers ‘ning dakbayan, lakip na usab ang panabang sa mga ginsakopan sa Philippine Guardians Brotherhood, Incorporated (PGBI).

Kini tungod kay matud pa ni Chief Amodia nga andam man nga motabang ang PGBI sa pagmentinar sa kahusay ug kalinaw ‘ning dakbayan.

Gipasabot usab niya nga tungod kay plain clothes man ang ilang isul-ob, dili makabantay kanila ang mga katawman nga nagplano sa paghimo og daotan.

Matud pa ni Chief Amodia na mahimo usab nga sangpiton sa Baybay City Police Station ang Provincial Public Safety Company (PPSC) nga anaa mahimutang sa Barangay Gaas ‘ning dakbayan.

Kini tungod kay matud pa niya nga ang mga ginsakopan sa PPSC ang gisangonan sa pagbantay sa mga istasyon nga naglisod.  “Kon daghan ang mga panghitabo sa usa ka police station, sila ang mo-rescue. So, swerte ‘ta kay naa ra sila sa atong duol, maka-request ‘ta dayon nila,” dugang pa ni Chief Amodia.

Gibutyag usab niya nga kinahanglan nga doblehon nila ang ilang himuon nga pagbantay batok sa mga daotang elemento aron walay makuotan o kaha mailad nga mga katawhan dinhi sa dakbayan sa Baybay.

Gipasabot ni Chief Amodia nga gikinahanglan ang dugang pagbantay tungod daghan na kaayo ang mga susama niini nga moatake karon, ilabi na sa panahon sa kagabhion.

Nunot niini, matud pa ni Chief Amodia nga, “Ang PNP mag-double time, walay mag-off gikan sa uno hangtud sa traynta y uno imbis nga sa usa ka seama kausa ra unta ‘mi makapauli.”

Sa katapusan, gi-awhag ni PSUPT AMODIA ang mga katawhan nga dili magdungan og tan-aw sa mga kalinganwan dinhi sa dakbayan sa Baybay.

Kini aron adunay mahibilin nga magbantay sa ilang panimalay.

Gipahinumdoman usab niya ang mga katawhan nga siguraduhon nga naka-lock ang ilang panimalay aron dili kini masudlan og mga kawatan.

Sa katapusan, gi-awhag ni Amodia ang mga Baybayanon sa pagtaho gilayon sa ilang buhatan kon aduna sila’y mga suliran o mga reklamo nga adunay kalambigitan sa kahusay ug kalinaw sa ilang barangay.

###