BISAYANG BALITA ‘NI, BAI

TALAGSAONG KAHIGAYONAN SA MGA NAGPANGIDARON OG KINSE ANYOS PATAAS

 

Nagpadayon ang Technical Education and Skills Development Authority (TESDA) sa pag-awhag sa mga nagpangidaron og kinse anyos pataas, nga mga molupyo sa Quinto Distrito sa Leyte, sa pag-apil sa National Technical Vocational Education and Training (TVET) Registration and Jobs Bridging.

Didto kini ipahigayon sa Baybay City Gym karong Marso dos ‘ning tuiga, sugod sa alas otso sa buntag.

Atol sa maong kalihokan, makapalista ang mga katawhan nga interesadong mokuha og mga kurso nga gitanyag sa TESDA aron sila mahimong scholars.

Atol sa interview kang TESDA Leyte Provincial Director Loreta Banario, iyang gibutyag nga ang Training for Work Scholarship Program (TWSP) pa lang ang ilang scholarship program nga aduna nay pondo sa pagka karon.

Ubos sa TWSP, libre ang training fee ug ang competency assessment fee apan walay madawat nga allowance ug tool kit ang mga TWSP scholars.

Matud pa ni TESDA Leyte Provincial Director Banario nga maghatag sila og 25 scholarship slots sa matag qualified training program sa matag tunghaan dinhi sa Quinto Distrito sa Leyte nga nagtanyag og mga TESDA courses.

Hinuon, matud pa ni Director Banario nga mahimo silang magparehistro og advance alang sa Special Training for Employment Program (STEP) nga ipahigayon usab unya sa TESDA pinaagi ni Congressman Jose Carlos Cari sa Quinto Distrito sa Leyte.

Ubos sa STEP, makadawat og allowance ug tool kit ang mga STEP scholars, libre na usab ang training fee, competency assessment fee ug ang entrepreneurship fee.

Apan gitataw ni Director Banario nga kinahanglan nga one at a time ra ang pagkuha og mga TESDA courses.

Kini nagpasabot nga kinahanglan nga tapuson usa sa usa ka trainee ang una nga kurso sa TESDA nga iyang gikuha sa dili pa siya makapa-enroll sa laing kurso sa TESDA nga makapalig-on sa iya nang nakat-onan sa una nga kurso nga iyang gi-apilan.

Samtang, kaabag unya sa TESDA ang Department of Labor and Employment (DOLE), ang Public Employment Service Office (PESO) ug ang CSWDO sa pagpahigayon sa Jobs Bridging sa mao gihapong adlaw.

Matud pa ni Dir. Banario nga tumong niining maong kalihokan nga katabangan sa pagpangita og trabaho ang mga katawhan nga walay trabaho, ilabi na ang mga graduates sa mga kurso nga gitanyag sa TESDA.

Alang sa dugang kasayuran, bisita lang sa City Social Welfare and Development Office ‘ning dakbayan sa Baybay ug pangitaa lang si Social Worker Officer III Manuel Icon Donayre.

Matawagan usab ang CSWDO ‘ning dakbayan sa telepono numbero (053) 563-9006. (Marissa Miguel Cano with reports from Jason Ybañez)

###