Baybay City Padayon sa Pag-suporta sa mga Fisherfolks ning’ dakbayan

Liboan (4,050) ka mga artificial reefs and gitunod sa napulo (10) ka mga Marine Protected Areas (MPAs) dinhi sa dakbayan sa Baybay nga walay mga natural coral reefs, segun sa gihimo nga assessment sa Coastal Resources and Fishery Management Office (CRFMO) sa dakbayan sa Baybay.

Gilangkoban kini niining mosunod nga barangay ‘ning dakbayan: Plaridel, Maslug, Bitanhuan, Sta. Cruz, Kilim, Gabas, Pangasugan, Marcos, Maybog, ug Caridad.

Mao kini ang gibutyag ni Ms. Alma Rose Prado, kawani sa CRFMO ‘ning dakbayan kinsa mao ang nangulo sa pagtunod sa nahisgotang mga artificial reefs.

Kahinumdoman nga atol sa Launching of Artificial Reefs in Barangay Plaridel, nagkanayon si Baybay City Mayor Hon. Jose Carlos L. Cari nga, “Kinahanglan ang kooperasyon sa mga mananagat kay dili na ninyo pwedeng sudlon. Ang importante karon nga ato unang hapsayon ang puy-anan ug itloganan sa mga isda aron modaghan sila diha.”

Angayang masayran nga gawas sa pagtunod og mga artificial reefs, gimando-an usab ni Mayor Cari ang CRFMO nga pangulohan ang paghimo og mga fiberglass banca. Nasayran nga sa unang higayon, baynte uno (21) ka mga fiberglass banca ang gi-release sa Baybay City LGU ngadto sa mga Bantay Dagat ‘ning dakbayan aron ilang magamit sa pagbantay sa ilang mga MPAs.

Baynte singko (25) usab ka mga fisherfolks associations ‘ning dakbayan ang nahilakip sa second batch of recipients sa fiberglass banca; samtang baynte nueve (29) ka mga tabangunon nga mga mananagat ang nahilakip sa third batch of recipients sa sa nahisgotang sakayan nga gihatag nga libre sa Lokal nga Kagamhanan.

Matud pa ni Prado nga wala pa sila’y gihuptan nga data on fish catch apan matud pa niya nga segun sa ilang gihimo nga binulan nga monitoring sa mga mananagat ‘ning dakbayan, nakasinati sila og inanay nga pagsaka sa ilang kuha gikan sa dagat hinungdan nga dako ang ilang pasalamat ngadto ni Mayor Cari gumikan niining maong mga programa alang sa mga gagmay’ng mananagat ‘ning dakbayan.

Angayang masayran nga sa pagpakighinabi uban kang Ms. Prado, iyang gibutyag nga on-going na ang paghimo sa fourth batch nga cuarenta (40) ka mga fiberglass banca diin ang uban niini ihulip sa mga nangaguba nga mga sakayan gumikan sa bagyong Odette sa miaging tuig.  (Marissa Miguel Cano, City Information Officer, Baybay City, Leyte)

###