Bugtong ang Baybay City LGU lang ang adunay Idol Ko Si Nanay nga pre-recorded videos

Usa si Baybay City Mayor Hon. Jose Carlos L. Cari sa mga Resource Speakers atol sa 75th Anniversary and 2022 Annual Convention of the Philippine Association of Nutrition (PAN, Inc.) dili pa lamang dugay (Hulyo 26, 2022). Angayang masayran nga gitambungan ang maong kalihokan sa mga Barangay Nutrition Scholars (BNS), mga Nutrition Action Officers, mga ginsakopan sa mga Local Nutrition Committees, mga Punong Barangay, ug mga volunteer health workers gikan sa nagkalain-lain mga dapit sa nasud.

Atol sa maong on-line convention, gisaysay ni Mayor Cari nga nasagmuyo siya sa resulta adtong 2017 Operating Timbang (OPT) hinungdan nga iya usang gihan-ay ang City Nutrition Office, naghimo og mga plano base sa resulta sa nahisgotang OPT ug gi-implementar gilayon ang nahisgotang mga plano uban sa masaligan nga mga kawani.

Matud pa ni Mayor Cari nga daghan ang mga programa sa nutrisyon nga gipahigayon sa dakbayan sa Baybay apan ang nakakuha sa pagtagad sa Philippine Association of Nutrition (PAN, Inc.) mao ang talagsaon nga pamaagi nga gihimo sa Baybay City LGU sa pagpahigayon og Mother’s Class ginamit ang pre-recorded videos nga giulohan og Idol Ko Si Nanay. Pinaagi niini, napahigayon nga hapsay sa mga BNS ang mga Mother’s Class sa ilang tagsa-tagsa ka mga barangay bisan pa kon wala naka-adto sa barangay ang mga resource persons.

Angayang masayran nga ang mga miyembro sa City Nutrition Committee gikan sa City Health Office, City Social Welfare and Development Office, City Agriculture Office, ug sa City Population Office ang nagsilbing resource persons sa nahisgotang mga pre-recorded videos. Samtang, ang City Information Office sa dakbayan ang nag-package sa maong pre-recorded video nga gi-record nga libre didto sa KR Recording Studio sa Zone 5 ‘ning dakbayan nga gipanag-iya ni Junjun Cano.

Matud pa ni Mayor Cari nga dako ang gikatabang niining mga pre-recorded videos aron padayon nag ma-edukar ang mga inahan kabahin sa ilang katungdanan sa ilang mga anak ug kon unsa ang mamahimong resulta kon ilang mapasagdan ang ilang mga anak, taliwala sa pandemya.

Sa katapusan, matud pa ni Mayor Cari nga, “Nakita naman natin ang resulta. Maaaring hindi pa po ito sapat pero naging mabuti na po ang status ng Baybay City sa sumunod na mga OPTs.  Salamat sa walang humpay na suporta mula sa National Nutrition Council (NNC), gayun din sa probinsiya at sa Rehiyon 8.” (Marissa Miguel Cano, City Information Officer, Baybay City, Leyte)

###