Nakahilak nga naghamdom sa mga panghitabo si Kantagnos Barangay Captain Hon. Michelle Cipe kay matud pa niya nga bisan kon tulo na ka bulan ang milabay, presyo pa gihapon alang kaniya ang nahitabo, “Sakit kaayo sa dughan, daghan ang nawad-an og pamilya, mga puluy-anan ug kapanginabuhian. Dili lalim ang magsud-ong nga ang imong mga tawo nag-antos.” Apan nagpasalamat siya og dako sa tanan nga mitabang kanila kay wala na man sila’y balikan pa sa ilang barangay, “Bisan pa sa nahitabo kanamo, naay daghang mitabang, wala kami pasagdi. So, thankful kaayo ko nga naay mga tawo nga andam nga motabang sa nagkinahanglan og tabang. Sa among kahimtang kay dili lalim nga wala kay kapuy-an.”
Sa laing bahin, nagpasalamat usab si Baybay City Mayor Hon. Jose Carlos L. Cari sa nagkadaiyang mga buhatan sa kagamhanan nga mitabang sa mga dakbayan sa Baybay, “To DSWD Regional Director Grace Subong kinsa walay putol ang pagtabang, ania usab si PBGEN BARNARD BANAC nga kanunay nga nagpadala og tawo ug hangtud karon ang inyong kapulisan nagtrabaho dito. Hatsa sa Bureau of Fire ipa-abot ‘sab ang among pasalamat ngadto kang CSUPT RODOLFO DENAGA gumikan sa pag-alalay gikan pa sa pagsugod hangtud karon sa paghimo sa temporary housing. Siyempre ang atong Armed Forces of the Philippines, gikan pa g’yud sa pagsugod naa sila hangtud karon nagtrabaho para sa inyong kabalhinan, gipangulohan nilang MGEN EDGARDO DE LEON ug COL NOEL VISTUIR.”
Gipasalamatan usab ni Mayor Cari ang mga humanitarian institutions, business groups, ug mga private individuals nga mitabang aron dili mawad-an sa paglaum ang mga biktima sa bagyong Agaton. Gipasalamatan usab niya ang Sangguniang Panlunsgod nga gipangulohan ni Vice Mayor Atty. Ernesto Butawan sa ilang makanunayon nga pagsuporta sa ilang mga plano, lakip na ang pag-approve sa pondo nga gipalit sa yuta nga gitukoran sa temporary shelters alang sa mga taga-Barangay Kantagnos ug sa paghimo sa kalsada padulong didto.
Mipadayag usab sa iyang pagpasalamat si Mayor Cari ngadto sa mga molupyo sa Barangay Maganhan, nga gipangulohan ni Barangay Captain Renato Magan, gumikan sa ilang pagsuporta usab sa maong programa sa nasundong kagamhanan.
Si Office of the Civil Defense Region 8 Regional Director Lord Byron Torrecarion, sa iyang kabahin, mibutyag nga una pa kini nga higayon nga gigamit ang whole of nation approach sa pagtukod of panimalay alang sa mga biktima’s katalagman dinhi sa Rehiyon Otso diin nagtibangay ang nagkadaiyang ahensiya sa nasudnong kagamhanan, “This would have not been possible without their help and cooperation.”
Angayang masayran nga cuarenta (40) pa lang ka mga temporary shelter ang natukod didto sa Barangay Maganhan ubos sa Phase I niining maong proyekto ug karon nga na-turnover na kini sa Baybay City LGU, sugdan na usab sa Office of Civil Defense, ug sa mga kaabag niini nga mga buhatan sa kagamhanan, ang Phase II sa maong proyekto nga mao ang paghimo sa dugang cuarenta (40) pa ka mga panimalay alang sa mga survivors sa Barangay Kantagnos.
###