Transport groups dinhi sa dakbayan sa Baybay mga frontliners usab

Sa dihang nahi-abot na ang bakuna dinhi sa dakbayan sa Baybay, lakip ang transport groups (potpot, tricycle ug multicab drivers) sa mga frontliners nga una nga gibakunahan batok sa COVID-19 tungod kay dako ang ilang risgo nga matakdan sa virus kay sila man ang ikahimamat sa mga bag-ong mangabot sa dakbayan.

Samtang, gumikan kay apektado man ang ilang kapanginabuhian sa pandemya, kay limitado man ang gitiguot nga gidaghanon sa pasahero, matag tulo (3) ka bulan silang gihatagan og ayuda (bugas, food packs, vitamins, face mask, ug transportation allowance) sa Lokal nga Kagamhanan sa dakbayan sa Baybay.

Matud pa ni Baybay City Mayor Hon. Jose Carlos L. Cari nga naghimo usab og ordinansa ang Sangguniang Panlungsod ‘ning dakbayan nga mihatag og mga kaayohan sa mga transport groups ‘ning dakbayan.

Nasayran nga kon masakit ang usa ka potpot, tricycle o multicab driver ug ma-ospital siya, hatagan siya sa Baybay City LGU og allowance nga dos siyentos pesos (P200.00) kada adlaw apan sulod lang sa napulo (10) ka adlaw kada tuig. Hinuon, kinahanglan nga magpakita siya og medical certificate nga magmatuod ngna na-ospital gayud siya.

Ubos usab sa maong ordinansa, makapa-check-up nga libre ang usa ka driver, uban sa ilang pamilya didto sa City Health Office ‘ning dakbayan, kinahanglan lang nilang ipakita ang ilang ID nga magmatuod nga lakip sila sa transport groups ‘ning dakbayan.

Matud pa usab ni Mayor Cari nga kon madisgrasya (simbako) ang usa ka sakop sa transport group ‘ning dakbayan ug motaliwan na kini sa laing kalibutan, may madawat usab nga hinabang gikan sa Lokal nga Kagamhanan ang ilang pamilya. May insurance usab ang mga transport groups diin ang Baybay City LGU ang nagbayad sa ilang premium.

Sa katapusan, nagpahinumdom si Mayor Cari nga kinahanglan nga magpasalamat kita sa kanunay sa Ginoo, ilabi na sa Patron Saint sa dakbayan sa Baybay nga si Immaculada Conception, tungod kay kanunay nga gi-iway ang dakbayan sa Baybay sa mga katalagman. (Marissa M. Cano, City Information Officer, Baybay City, Leyte)

###