Kinahanglan nga mokuha og health card ang tanan nga mga trabahante sa mga food and non-food establishments dinhi sa dakbayan sa Baybay.
Mao kini ang gitataw ni Health Promotion In-charge Nurse Wayne Gunhuran sa City Health Office’ning dakbayan dili pa lamang dugay.
Atol sapagpakighinabi kaniya sa “Nasayod ka ba, Bai?” News Team, gibutyag ni Gunhuran ang mga requirements sa pagkuha og health card.
Alang sa mga food establishments, Stool Examination, Hepa A Examination, usa ka 1×1 ID picture, duha (2) ka documentary stamp, ug medical fee nga usa ka gatos ka pesos (P100.00).
Alang sa mga non-food establishments: Chest X-ray, usa (1) ka 1×1 ID picture, duha (2) ka documentary stamp,ug medical fee nga usa ka gatos ka pesos (P100.00).
Nunot niini, nagkanayon si Gunhuran nga aron kalikayan ang kalangan sa pagkuha og health card, kinahanglan nga siguruhon nila sa pagdala ang tanan nga mga requirements sa dili pa sila muadto sa City Health Office (CHO) nga anaa mahimutang sa Zone 23 ‘ning dakbayan.
Matud pa usab ni Gunhuran nga kon negatibo ang resulta sa laboratory examination, hatagan gilayon nila og health card ang usa ka aplikante ug dili na kinahanglan nga magpakonsulta pa sa doktor.
Sa iyang kabahin nagkanayon si Medical Officer V, Dr. Jerome Profetana nga gi-require sa balaod ang mga health certificates sa tanan nga mga establishments aron kapanalipdan ang ilang mga cutomers.
Partikular nga gitumbok ni Dr. Profetana ang Hepatitis A nga motakod pinaagi sa tubig ug sa pagkaon.
Nasayran nga mao usab kini ang hinungdan nga sa dili pa hatagan og Sanitary Permit sa CHO ang usa ka establisimiyento, gi-require sa CHO ang medical card sa ilang mga trabahante.
Hinuon, matud pa ni Gunhuran nga kon positibo ang resulta sa laboratory examination sa usa ka trabahante, dili sila angayan nga mabalaka tungod kay katambalan man sila nga libre sa CHO. “Ug kon human sa usa ka semana nga treatment, mag-negative na ang result sa ilang laboratory exmaination, hatagan na namo sila og health card,” dugang pa ni Gunhuran.
Nunot niini, nag-awhag ang City Health Office ‘ning dakbayan nga motuman gayud sa mga balaod ang mga magpapatigayon ‘ning dakbayan aron kalikayan ang problema sa umaabot nga mga adlaw.
Gitataw usab ni Dr. Profetana nga maoy tumong sa kagamhanan nga kapanalipdan ang mga katawhan batok sa mga sakit hinungdan nga namugna ang mga balaod nga adunay kalambigitan sa Environmental Sanitation.
Sa katapusan, nagkanayon si Gunhuran nga pinasikad sa Presidential Decree 856, nga mas nailhan sa tawag nga Sanitation Code of the Philippines, kinahanglan nga isul-ob sa mga trabahante ang ilang health card sa tanan nga higayon nga anaa sila sa sila gitabaho-an. (Marissa Miguel Cano, City Information Officer III, Baybay City, Leyte)
###