“Dili nato mandungan og vacate ang mga rooms kay depende man ‘na sa mahuman na nga temporary shelters sa Office of Civil Defense (OCD). So, itagi-tagi nato sila og kuha, 40 families lang usa unya mosunod naman pud og kahuman ang another 40 units.” Mao kini ang gipasabot ni Baybay City Mayor Hon. Jose Carlos L. Cari atol sa City Inter-Agency Task Force for the Management of Emerging Infectious Diseases (City IATF-MEID) dili pa lamang dugay.
Matud pa ni Mayor Cari nga kinahanglan nga mosabot ang mga hingtungdan nga ingon niini gayud ang pamaagi apan gibuhat sa Lokal nga Kagamhanan sa dakbayan sa Baybay ang tanan aron makabalhin na sa labing dali nga panahon ang mga survivors sa bagyong Agaton, “Kinahanglan nga sa 40 units maka-free up ‘ta og usa ka building para magamit na nila sa face-to-face classes kay nakadistorbo man ‘ta sa DepEd. Then immediately sugdan na pud ang another 40 units kay dili lagi lalim magpuyo sa Evacuation Center.”
Hinuon, gipasabot ni City Social Welfare and Development Officer Dr. Manuel Icon Donaire nga adunay gihimo nga pamaagi ang Department of Social Welfare and Development (DSWD) kon unsaon sa pagpili ang unang cuarenta (40) ka mga pamilya nga ibalhin sa temporary shelter nga gihimo sa Office of Civil Defense (OCD) alang sa mga survivors sa bagyong Agaton sa Barangay Kantagnos ‘ning dakbayan, base sa ilang vulnerability index. “So, kadtong naay mga senior citizens, persons with disability ug mga buntis ang una nga ilabhin sa temporary shelters sa Barangay Maganhan,” dugang pa ni Donaire.
Apan gitataw ni Mayor Cari nga kinahanglan nga mabakante ang usa ka building sa Baybay City Senior High School sa pagbalhin sa unang 40 ka mga pamilya, “So, kadtong mga dili apil sa priority groups base vulnarability indez sa CSWD, kinahanglan nga mobalhin nalang usa og room.” Nunot niini, iyang gimando-an si Donaire sa pagdumala sa pagbalhin sa unang 40 ka mga pamilya didto sa Temporary Shelter sa Barangay Maganhan, “Basta ang importante nga nga maka-vacate ‘ta og building para magamit na nila sa face-to-face classes.”
Angayang masayran nga pormal na unyang i-turnover ugma (Hulyo 15, 2022) sa Office of Civil Defense (OCD) ngadto sa Baybay City LGU ang unang 40 units sa mga temporary shelters nga ilang gihimo didto sa Barangay Maganhan alang sa mga survivors sa Tropical Storm (TS) Agaton sa Barangay Kantagnos ‘ning dakbayan. Apan daghan pa ang kulang nga temporary shelters alang sa Barangay Kantagnos tungod kay 165 ka mga pamilya karon ang anaa nagpuyo sa Byabay City Senior High School isip Evacuation Center.
###