Barangay Bitanhuan nag-una sa Blood-typing Activity sa BCLBC

Lakip ang mga hingkod na ang panuigon nga mga molupyo sa Barangay Bitanhuan ‘ning dakbayan sa Baybay, miapil sa blood typing nga gipasi-ugdahan sa Baybay City Local Blood Council (BCLBC), nga gipanguloan ni BCLBC Honorary Chairman ug Baybay City Mayor Carmen L. Cari, tungod kay wala sila mahibalo sa ilang blood type. (Photo Credits: Jayvee Campomayor)

BISAYANG BALITA ‘NI, BAI

Barangay Bitanhuan nag-una sa Blood-typing Activity sa BCLBC

Sitenta y dos (72) ka mga molupyo sa Barangay Bitanhu-an ‘ning dakbayan sa Baybay ang misalmot sa gipahigayon nga Barangay Blood Council Advocacy and Blood Donation Awareness Campaign sa nahisgotang barangay dili pa lamang dugay.

Mao kini ang gibutyag ni Medical Officer V sa City Health Office ‘ning dakbayan ug Baybay City Local Blood Council (BCLBC) Chairman, Dr. Norberto Oja.

Matud pa ni Dr. Oja nga tumong niining maong kalihokan nga ikapasabot ngadto sa mga molupyo sa Barangay Bitanhu-an kon unsa ang mga bentaha sa pag-donate og dugo.

Una, makatabang kita sa mga nagkinahanglan og dugo, ilabi na sa mga kabus nga dili maka-akos sa pagpalit niini; ma-screen nga libre ang atong dugo diin masayran kon aduna ba kita’y balati-an o wala, aron kon pananglitan aduna kita’y balati-an, katambalan gilayon kita; ug ang pagkuha og dugo sa atong lawas maka-stimulate sa atong bone marrow sa pag-produce og bag-o nga dugo.

Samtang, nag-blood typing usab ang BCLBC sa mga molupyo sa Barangay Bitanhu-an aron masayon na unya ang pagpangita og mga blood donors sa ilang barangay sa panahon sa emerhensiya.

Matud pa usab ni Dr. Oja nga mahimo na unyang potential stand-by blood donors ang nahisgotang mga katawhan kon magpahigayon na sila og Barangay Blood Donation Activity.

Sa kabahin sa mga molupyo sa Barangay Bitanhu-an, gikalipay nila ang maong kalihokan tungod kay kon dili pa tungod sa maong Blood-typing Activity sa BCLBC dili gayud sila kahibalo kon unsa ang ilang blood type.

Angayang masayran nga nagpasar og resolusyon ang Sangguniang Panlungsod ‘ning dakbayan nga nagmando sa pagtukod og mga Barangay Blood Council sa noventa y dos ka mga barangay ‘ning dakbayan sa Baybay.

Kini tungod kay matud pa ni Dr. Oja nga segun pa sa Akta Repubika 7719 o ang National Blood Services Act of 1994, nga mas nailhan isip An Act Promoting Voluntary Blood Donation, kinahanglan nga makahatag ang usa ka Lokal nga Kagamhanan og napulo (10) ka bag sa dugo sa matag usa ka libo (1,000) nga populasyon sa usa ilang lugar.

Busa, tungod kay pinasikad sa Barangay Management Information System (BMIS) sa dakbayan, kapin na sa 121,000 ang populasyon sa dakbayan sa Baybay hinungdan nga kinahanglan nga 1,210 ka bag nga dugo ang ma-donate niini matag tuig.

Nunot niini, gikatakdang magpahigayon og Blood-typing ang mga ginsakopan sa BCLBC sa nahibiling noventa y uno (91) pa ka mga barangay ‘ning dakbayan. Hinuon, matud pa ni Liga ng mga Barangay President, Hon. Mandy Muñez nga unahon nila ang pag-Blood-typing sa mga dagkong barangay ‘ning dakbayan sa Baybay sama sa Barangay Plaridel, Barangay Caridad ug Barangay Pomponan.

Angayang masayran nga matud pa ni Dr. Oja nga natukod ang BCLBC sa tinguha nga matubag ang panginahanglanon sa dugo sa Western Leyte Provincial Hospital (WLPH) ug sa Baybay City Medical Diagnostic and Dialysis Center (BCMDDC).

Gilangkoban ang BCLBC, Sangguniang Panlungsod sa dakbayan sa Baybay, sa Liga ng mga Barangay, sa City Health Office (CHO), Western Leyte Provincial Hospital (WLPH), Baybay City Medical Diagnostic and Dialysis Center (BCMDDC), Eastern Visayas Regional Medical Center (EVRMC), VSU Hospital ug sa Philippine Red Cross Ormoc City Chapter.

Sakop usab sa BCLBC ang Baybay City Division, Franciscan College of the Immaculate Concepcion, Visayas State University; City Social Welfare and Development Office, City Administrator’s Office, City Information Office, Philippine National Police (PNP), Bureau of Fire Protection (BFP), Knights of Columbus, Crystal Lion’s Club, Baybay City Chamber of Commerce and Industry ug ang Immaculate Concepcion Parish.

Matud pa ni Dr. Oja nga, “During emergency muadto pa sa Ormoc City para magpa-screen sa dugo.  Unya, wala man ‘tay ensakto nga pondo sa dugo mao nga mo-resort nalang sa mga commercial blood donors ang mga tagtungod.  So, madoble na ang bayranan sa dugo, magbayad pa sa screening, bayran pa g’yud ang dugo.  Gani, kada bulan nga nagpadala og bill ang Red Cross Ormoc sa atong balayranan sa screening sa mga dugo alang sa mga Baybayanon.

Nunot niini, malaomon si Dr. Oja nga pinaagi sa mga kalihokan sa BCLBC, mamenosan ang galastuhan sa Lokal nga Kagamhanan sa dakbyan sa Baybay tungod kay daghan na man unya ang mag-donate og dugo sa Quarterly Bloodletting Activity sa BCLBC.

Hinuon, matud pa ni Dr. Oja nga segun pa sa World Health Organization (WHO), dili mahimong mag-donate og dugo ang mga tawo nga adunay cancer, sakit sa kasing-kasing, congestive heart failure, may sakit sa baga sama sa tuberculosis, may sakit nga hepatitis (viral man o bacterial), ang mga migamit og iligal nga druga, ang mga commercial sex worker, mga Persons Living with Human Immuno-Deficiency Virus (PLHIV), mga tawo nga kusog magdugo, ug ang mga tawo nga kalit lang nga miubos ang timbang. (Marissa Miguel Cano – City Information Officer III)

###

Baybay City CSWDO Nagkinahanglan og mga Kababayen-an nga Interesadong Magkat-on

Enero 7, 2017

Ipahigayon karong bulan sa Febrero dos mil disisiyete (2017) sa City Social Welfare and Development Office (CSWDO) ‘ning dakbayan sa Baybay ang mga skills training alang sa mga kababayen-an ‘ning dakbayan.

Mao kini ang gibutyag ni Social Welfare Officer I Ms. Margie Gonzales sa CSWDO ‘ning dakbayan.

Atol sa pagpakighinabi sa “Nasayod ka ba, Bai?” News Team, gibutyag ni Gonzales nga tulo ka mga trainings nga adunay kalambigitan sa Food Processing ang ila unyang ipahigayon.

Gilangkoban kini sa Smoking and Salting, Food Pickling ug Sugar Concentration.

 Matud pani Gonzales nga baynte singko (25) ka mga trainees ang ilang gikinahanglan sa matag usa niining tulo ka mga training modules.  Kini nagpasabot nga sitenta y singko (75) ka mga kababayen-an ang ilang gilaoman nga mosalmot niining maong mga pagbansay-bansay sunod bulan.

Nasayran gikan ni Gonzales nga molungtad lang og napulo 10) ka adlaw ang maong mga trainings. Hinungdan nga malaomon siya nga daghan ang mga kababayen-an nga mo-apil niini.

Ang laing training alang sa mga kakabayen-an nga ipahigayon usab sunod bulan mao ang Training on Hair Cutting.

Matud pa ni Gonzales nga molungtad usab kini og napulo (10) ka adlaw apan cuarenta y uno (41) lang ka mga kababayen-an ang gikinahanglan alang niining maong pagbansay-bansay.

Samtang, aron pagdasig sa mga kababayen-an sa pagsalmot niini, nasayran nga makadawat og saysenta pesos (Php60.00) nga allowance matag adlaw ang mga trainees atol unya sa ilang graduation ceremonies.

Sumala pa ni Gonzales nga adto ipahigayon ang mga trainings sa Baybay City Technical Vocational Training Center sa Barangay Cogon ‘ning dakbayan sa Baybay.

Nunot niini, iyang gi-awhag ang tanan nga mga interesado sa pagsumite sa ilang high school card o diploma, birth certificate, certificate of indigency ug 2 ka buok passport size nga hulagway.

Angayang masayran nga tipik ang maong mga trainings sa programa sa Technical Education and Skills and Development Authority (TESDA) karong tuiga.

Alang sa dugang kasayuran mahitungod niining maong mga pagbansay-bansay adto lang sa buhatan sa City Social Welfare and Development Office (CSWDO) ‘ning dakbayan nga anaa mahimutang sa luyo nga bahin sa General Services Office (GSO) ‘ning dakbayan.

###

Mga Barangay Officials ‘ning Dakbayan sa Baybay Gi-awhag sa BFP sa Pagsalmot sa Barangay Hugnayan

Enero 7, 2017

Gi-awhag ni SFO2 Helcon dela Torre sa Bureau of Fire Protection (BFP) sa dakbayan sa Baybay ang mga barangay officials ‘ning dakbayan sa Baybay kabahin sa pagsalmot sa “Barangay Ugnayan”.

Usa kini ka programa sa BFP aron ma-edukar ang mga katawhan kabahin sa pag-atubang ug sa pagpangandam sa panahon sa katalagman o kon adunay emerhensiya.

Matud pa ni dela Torre nga miadto na sila sa pipila pa lamang ka mga kabarangay ‘ning dakbayan aron pagtudlo sa mga katawhan kabahin sa fire protection, fire suppression, first aid ug rescue.

Kini tungod kay wala man patalinhugi sa mga barangay officials ang ilang hangyo nga magpahigayon sila og susama niini nga mga kalihokan diha sa ilang barangay.

Atol sa pagpakigpulong ni dela Torre sa Assembly Meeting sa Association of Barangay Captains ‘ning dakbayan kagahapon, iyang gipasabot nga gimando sa Akta Republika 10121 (Philippine Disaster Risk Reduction and Management Act of 2010) ug sa Akta Republika 9514 (Fire Code of the Philippines) ang pagtukod og Barangay Emergency Response Team (BERT) sa matag barangay sa nasud.

Nunot niini, iyang gi-awhag ang mga Barangay Captains sa pagpili og mga molupyo sa barangay nga paapilon unya nila sa lima ka adlaw nga pagbansay-bansay alang sa mga ginsakopan sa Barangay Emergency Response Team. “Kinahanglan nga batan-on ug kusgan kay rigorous raba ‘ni nga training. Kinahanglan ‘sab nga himsog kay unsaon unya niya pagtabang sa uban kon labaw pa siyang tabangonon? Kon mahimo, kadtong mga kamaong molangoy.  Apan labaw sa tanan, kinahanglan nga aduna siya’y sense of volunteerism,” dugang pa ni dela Toree.

Sa katapusan, gihagit ni dela Torre ang mga barangay officials sa pagpakabana ug sa pagkat-on sa mga kasayuran nga ilang gitudlo alang sa kabulahanan sa ilang barangay ug sa mga molupyo niini.

Matud pa niya nga kon dili palig-onon sa mga kabarangayan ang ilang kaugalingon, posibleng adunay kinabuhi nga makalas sa panahon nga adunay sunog kay wala may nasayod kon unsa ang ilang buhaton.

Gibutyag usab ni dela Torre nga sapagka karon walay mga first responders diha sa mga kabarangayan ‘ning dakbayan.

Hinungdan nga kon adunay mahitabong sunog o disgrasya sa ilang barangay, nagsalig pa sila sa tabang gikan sa mga buhatan sa kagamhanan nga anaa mahimutang sa poblacion ‘ning dakbayan.

Angayang masayran nga gipahigayon ang panagtigom sa ABC ‘ning dakbayan sa Auditorium sa Legislative Building dinhi sa dakbayan sa Baybay.

###

Enero 20, 2017: Katapusang Adlaw sa Pag-renew sa Business Permit Dinhi sa Dakbayan sa Baybay

Enero 7, 2017

Giawhag sa Business Permit and Licensing office (BPLO) dinhi sa dakbayan sa Baybay ang tanan nga mga negosyante ‘ning dakbayan sa pag-renew sa ilang mga lisensya ug business permit alang sa tuig dos mil disi siyete sa labing dali nga panahon.

Mao kini ang gibutyag ni BPLO Head, Ms. Gina Cabras, atol sa pagpakighinabi kaniya sa “Nasayod ka ba, Bai”, New’s Team.

Matud pa ni Cabras nga importante ang pag-renew sa ilang lisensiya ug business permit sulod sa gikatakdang panahon aron kaliyanan ang silot gumikan sa non-issuance of business permit.

Nasayran usab gikan kaniya nga gikatakda karong Enero 20, 2017 ang katapusang adlaw sa pagbayad sa ilang mga balayranan sa Lokal nga Kagamhanan sa dakbayan sa Baybay.

Matud pa ni Cabras nga kon lapas na niining maong adlaw mag-renew sa ilang lisensiya ug business permit ang mga negosyante ‘ning dakbayan, multahan na sila sa buhatan sa BPLO.

Samtang, aron kalikayan ang kalangan sa pagproseso sa ilang mga papeles, gi-awhag ni Cabras ang mga magpapatigayon sa pagdala daan sa ilang 2016 Business Permit, Market Clearance ug Barangay Business Clearance.

Nasayran nga gisugdan na usab nila ang pagpahigayon sa programang Business One Stop Shop (BOSS).

Nunot niini, ang mga tinugyanan na sa Bureau of Fire Protection ug City Health Office ang moadto sa BPLO aron pagproseso sa gikinahanglan nga mga dokumento sa mga negosyante ‘ning dakbayan.

Kini tungod kay matud pa sa mga magpapatigayon nga usa sa mga makapabugnaw kanila sa pagproseso sa ilang business permit mao ang gilay-on sa nahimutangan sa buhatan sa BFP ug CHO ‘ning dakbayan.

Hinuon, gitataw ni Cabras nga sa bulan sa Enero ug Febrero ra nila ikapatuman ang Business One Stop Shop (BOSS) tungod sa kakulang sa mga kawani sa BFP ug CHO.

Alang sa dugang kasayuran kabahin sa pag-apply og lisensiya ug business permit, bisitaha lang ang Business Permit and Licensing Office nga anaa nahimutang  sa Ground Floor sa Baybay City Hall.

###

Baybay City OIC-CLGOO Nagpahinumdom sa mga Administrative Requirements sa mga Kabarangayan

Enero 7, 2017

Gipatawag ni OIC-Local Government Operations Office Estela I. Creer sa Department of Interior and Local Government (DILG) ang mga Kapitan ug mga Barangay Secretaries ‘ning dakbayan sa Baybay kagahapong adlawa.

Kini aron pasabton sila sa gitawag nga mga administrative requirements sa usa ka barangay sama sa national flag, hulagway sa Presidente sa nasud, bulag nga logbook alang sa mga bisita, Officer-on-the-Day, mga Barangay Tanod ug uban pa.

Matud pa usab ni CLGOO Creer nga kinahanglan nga anaa sa Barangay Hall ang tanan nga mga records sa Barangay Secretary ug Barangay Treasurer. “Kinahanglan usab nga properly labeled kini aron dili unya  lisod ang pagpangita kon gikinahanglan kini,” dugang pa ni CLGOO Creer.

Midugang sa pagkanayon si Creer nga kinahanglan nga adunay Organizational Structure ang matag barangay.  Apan gitataw usab niya nga kinahanglan nga husto ang pagkapahiluna sa mga linya niini.

Matud pa niya, “Naay uban nga organizational structure, gibutang ilalom sa Kagawad sa Peace and Order and mga Barangay Tanod.  Sayop na.  Ang uban ‘sab gibutang ubos sa Kagawad sa Health ang mga Barangay Health Workers.  Dili gihapon ‘na mao!”

Atol sa pagpakigpulong ni CLGOO Creer, iya usab nga gipasabot ang mga barangay officials nga kinahanglan nga anaa sa Barangay Hall ang tanan nga mga kagamitan sa barangay, sama sa computers.

Nunot niini, iyang gi-awhag ang mga Kapitan sa pag-secure sa ilang mga Barangay Hall aron wala nay rason pa nga dalhon ang computer sa barangay ngadto sa panimalay sa Barangay Secretary o sa Barangay Treasurer.

Kini tungod kay segun pa sa iyang pasi-unang pakisusi, adunay mga Barangay Secretary o Barangay Treasurer nga migamit sa mga computers sa barangay alang sa ilang personal nga mga katuyo-an.

Nunot niini, nagkanayon si CLGOO Creer nga mobisita unya siya sa mga kabarangayan nga dili magpasabot sa mga barangay officials aron pagsusi kon gituman ba nila ang maong mga administrative requirements.

Nunot niini, gidapit ni Federation of Barangay Secretaries President Junjie Milleza si OIC-CLGOO Creer sa pagtambong sa ilang panagtigom karong Enero 27, 2017 sa Auditorium sa Legislative Building ‘ning dakbayan.

Kini aron hisgotan ang detalye mahitungod sa nahigsotan nga mga administrative requirements ug sa uban pang mga concerns sa mga Barangay Secretaries ‘ning dakbayan.

###

Ikaduhang Dapit sa National Search for the Most RICEponsible Local Government Units 2016

Enero 5, 2017

Nakuha sa Baybay City, Leyte ang ikaduhang dapit sa National Search for the Most RICEponsible Local Government Units 2016.

Sumala pa sa taho nga gisalmotan ang maong indigay sa baynte cuatro (24) ka mga Local Government Units sa tibuok nasud.

Isip ganti, nakadawat og Plaque of Recognition, gikan sa Department of Agriculture Philippine Rice Research Institute (DA-PhilRice) Central Experiment Station ang Lokal nga Kagamhanan sa dakbayan sa Baybay.

Nasayran nga nakuha sa Lokal nga Kagamhanan sa dakbayan sa Baybay ang maong pasidungog gumikan sa mga kalihokan nga gipahigayon niini aron madasig ang mga katawhan sa pagkaon og brown rice o mixed rice tungod kay mas sustansiyado kin ikon itandi sa puti lang nga kan-on.

Gipatik usab sa maong Plaque of Recognition nga dako ang gikatabang sa RICEponsible Campaign aron mas modako ang kita sa mga mag-uuma sa humay pinaagi sa pagdasig kanila sa pagsunod sa mga bag-ong pamaagi sa pagpanguma.

Gumikan usab sa RICEponsible Campaign, gihatagan og pasidungog ang mga mag-uuma gumikan sa ilang kahago nga maka-produce sa gikinahanglan nga pagkaon sa nasud, partikular na sa bugas humay.

Angayang mahibalo-an nga maoy tumong sa RICEponsible Campaign nga makatabang ang mga Lokal nga Kagamhanan sa pagkab-ot sa rice self-sufficiency sa nasud.

Gawas sa nahisgotang Plaque of Recognition, nakadawat usab ang Baybay City og tunga sa milyon ka pesos nga ganting salapi.

Hinuon, segun sa Workplan Schedule nga gihatag sa DA-PgilRice ngadto sa Lokal nga Kagamhanan sa dakbayan sa Baybay, gamiton ang maong pondo alang sa mas halapad nga kampanya sa “Be RICEponsible” sa tibuok dakbayan sa Baybay.

###

Mga Surrenderors ‘ning Dakbayan, Gi-awhag sa Pag-adto sa Baybay City Police Station alang sa Documentation

Enero 5, 2017

Giawhag ang mga hingtungdan nga mga Drug Pushers ug Users dinhi sa dakbayan sa Baybay sa pag-surrender na ngadto sa buhatan sa Baybay City Police Station.

Mao kini ang gibutyag ni Chief of Police, Police Superintendent Ramil N. Amodia atol sa pagpakighinabi kaniya sa “Nasayod ka ba, Bai” New’s Team.

Matud pa ni Amodia nga dili sila angay nga mabalaka tungod kay andam ang kapulisan sa dakbayan sa Baybay sa pagtabang kanila.

Misaad usab siya nga walay laing masayod kabahin sa iyang pag-surrender tungod kay magpabiling tali lamang kini kaniya ug sa Baybay City Police Station.

Gipasabot ni Chief Amodia nga mas maayo kon motahan nalang sila sa ilang kaugalingon ngadto sa kapulisan tungod kay walay kapuslanan ang druga ug makaguba lamang kini sa kaugmaon sa mga kabataan ‘ning dakbayan.

Pinaagi usab niini, magmalinawon na unya ang dakbayan ug malimpiyo na usab ang Baybay City sa mga drug users ug pushers.

Matud pa ni Chief Amodia nga aduna sila’y listahan sa mga Identified Drug Users ug Pushers nga wala pa ‘ning surrender sa kapuolisan.

Hinungdan nga nanawagan siya sa ilang pag-surrender sa labing dali nga panahon.

Hinuon, matud pa ni Chief Amodia nga daghan pa sa mga mi-surrender na ang wala pay klarong documentation hangtud karon.  Tungod kini kay naggdumili sila sa pag-cooperate sa kapulisan.

Nunot niini, gi-awhag ni Chief Amodia ang mga barangay officials sa pagtabang kanila nga makuhaan og proper documentation ang mga drug surrenderees sa ilang tagsa-tagsa ka mga barangay.

Gipasabot ni Chief Amodia nga sa higayon nga makuhaan na og proper documentation ang nahisgotang mga drug surrenderees, makakuha na unya sila og Police Clearance, gawas lang kon nakahimo sila og laing salaod.

Atol sa pagpakighinabi sa “Nasayod ka ba, Bai?” News Team gibutyag usab ni Chief Amodia nga kon padayon sa pagdumili sa pag-cooperate kanila ang mga drug surrenderees, mapugos sila sa pag-“TUKHANG” kanila pag-usab.

###

Public Hearing Kabahin sa Revised Revenue Code sa Dakbayan sa Baybay Ipahigayon

Enero 5, 2017

Gi-awhag ang tanan nga mga interesado sa pagtambong sa ipahigayon nga PUBLIC HEARING karong Enero 10, 2017, ala 1:30 ang takna sa hapon.

Adto kini ipahigayon sa Auditorium sa Legislative Building ‘ning dakbayan sa Baybay.

Mao kini ang gibutyag ni Sangguniang Panlungsod (SP) Secretary Atty. Vivian Vidallon atol sa pagpakighinabi sa “Nasayod ka ba, Bai” News Team.

 Matud pa ni Atty. Vidallon nga hisgotan atol sa maong PUBLIC HEARING ang mahitungod sa REVISED REVENUE CODE OF THE CITY OF BAYBAY 2016.

Angayang masayran nga usa ang UPDATED REVENUE CODE sa mga gikinahanglan aron makabaton og SEAL OF GOOD LOCAL GOVERNANCE ang usa ka Lokal nga Kagamhanan.

Gikinahanglan usab kini aron makabaton og dugang pondo ang usa ka Lokal nga Kagamhanan alang sa katumanan sa iyang DEVELOPMENT PLAN.

Hinuon, matud pa ni Sangguniang Panlungsod Member, Atty. Ernesto Butawan  nga able pa ang maong ordinansa alang sa mga sugyot ug mga pangutana gikan sa nagkadaiyang sector ‘ning dakbayan.

Nunot niini, gi-awhag ni Atty. Butawan ang tanan nga mga interesado sa pagtambong niining maong public hearing.

###

Plitehan sa Tricycle Siyete Pesos na, apan sa Potpot Singko Pesos lang Gihapon

Enero 5, 2017

Plitehan sa tricycle sa poblacion ‘ning dakbayan sa Baybay siyete pesos na sugod karong Enero 1, 2017.

Mao kini ang gibutyag ni Traffic Enforcers’ In-charge Mr. Arnel Galano sa Bus Terminal and Traffic Management Office (BTTMO) ‘ning dakbayan sa Baybay.

Atol sa pagpakighinabi kang Galano, iyang gisaysay nga pinasikad sa Ordinance #7, Series of 2015, seis pesos (Php6.00) na ang minimum fare sa mga tricycle ‘ning dakbayan.

Apan gilatid sa resolusyon nga giluwatan sa Sangguniang Panlungsod ‘ning dakbayan nga sugod sa Enero 1, 2017 i-implementar na ang dugang piso sa gikatakdang minimum fare sa mga tricycle nga nagbiyahe-an sa poblacion ‘ning dakbayan.

Tungod niini, siyete pesos (Php7.00) na ang minimum fare sa mga tricycle nga nagbiyahe-an sa poblacion ‘ning dakbayan sugod karong tuiga.

Hinuon, gitataw ni Galano nga walay labot niining maong ordinansa ang plitehan sa mga potpot.

Kini tungod kay matud pa ni Galano nga wala man naghimo og resolusyon ang mga potpot drivers kabahin sa pagpasaka sa plitehan sa potpot ‘ning dakbayan.

Hiungdan nga nagpabilin nga singko pesos (Php5.00) ang plitehan sa potpot dinhi sa dakbayan sa Baybay.

Matud pa ni Galano, “Kon adunay maningil ninyo og sobra, kuhaa ninyo ang number ug i-report namo kay bawal na sila manukot og sobra sa singko pesos.”

 Hinuon, matud pa ni Galano nga depende sa kabubut-on sa pasahero, mahimo siyang mohatag og plite nga labaw pa niini, “Kon inyong kinasing-kasing kon pila ang inyong ihatag sa potpot driver pero ang minimum fare nato sa potpot singko pesos ra g’yud.”

Alang sa dugang kasayuran, bisita lang buhatan sa Bus Terminal and Traffic Management Office (BTTMO) nga anaa mahimutang sa likod sa Baybay City Gym ug pangita-a lang si Mr. Arnel Galano.

###

Pagsaulog sa BAMAVA Anniversary Karong Tuiga Nagmalampuson

Disyembre 3, 2016

Gisaulog karong tuiga ang ika-singkwenta y uno (51st) nga anibersaryo sa Baybay Vendors Market Association (BAMAVA) dili pa lamang dugay.

Gipangulohan ang maong kasaulogan sa mga Key Officers ug Section Chairpersons sa BAMAVA ubos sa pagdumala ni BAMAVA President Romulo Alcala.

Gitambungan kini sa mga kadagkuan sa Lokal nga Kagamhanan sa dakbayan sa Baybay nga gipangulohan nilang City Mayor Carmen Cari ug Vice Mayor Michael Cari.

Nasayran nga gitambungan usab kini nilang Sangguniang Panlungsod (SP) Members Hon. Ernesto Butawan, Hon. Arturo Elisa Astorga, Hon. Leoncio Asilom Jr., Hon. Felimon Avila, Hon. Jorge Rebucas, ug sa mga manindahay dinhi sa dakbayan sa Baybay.

Gisugdan ang maong kalihokan sa usa ka parada palibot sa poblacion ‘ning dakbayan uban sa maanindot nga mga floats sa matag section sa merkado publiko ‘ning dakbayan.

Human sa ilang parada, mipatighulog ang mga ginsakopan sa BAMAVA sa Baybay City Gym diin gipahigayon ang usa ka programa atol sa unang adlaw sa bulan sa Disyembre.

Usa sa labing gikahinaman nga parte sa maong programa mao ang Folk Dance Competition nga gisalmotan sa siyam (9) ka mga sections sa BAMAVA.

Gilangkoban kini sa Vegetables/Spices/ Egg Section; Fruit and Root Crops; Rice and Corn with Groceries Section; Fresh Fish Section; Dried Fish Section; Meat Section; Dressed Chicken and Barbecue Section; Baybay Terminal Peddlers Association (BATPA); ug ang Native Delicacies, Charcoal, Tabakoan, Sundangan, and Furniture Section.

Nasayran nga ang Dressed Chicken Section maoy midaog sa Best in Uniform/Best in Costume Category diin nakadawat sila og ganting salapi nga tres mil pesos (Php3,000.00).

Samtang, ang Fruits and Root Crops Section usab ang nakadaog sa Best in Float diin nakadawat usab sila og ganting salapi nga singko mil pesos (Php5, 000.00).

Sa Folk Dance Competition, sa laing bahin, ang Fish Section ang miguwang mananaog diin nakadawat sila og ganting salapi nga syete mil pesos (Php 7, 000.00).

Gikalipay ni Baybay City Mayor Carmen L. Cari ang padayon nga pasuporta sa mga ginsakopan sa BAMAVA sa mga kalihokan dinhi sa dakbayan sa Baybay.

Hinungdan nga karong tuiga, gihatagan sila sa Lokal nga Kagamhanan sa dakbayan sa Baybay og singkuwenta mil pesos nga hinabang pinansiyal alang sa ilang mga kalihokan.

###