News

Gipanghingusgan karon sa Local Vaccination Operation Center (LVOC) sa dakbayan sa Baybay ang pagpamakuna sa mga senior citizens ‘ning dakbayan. Kini aron kapanalipdan sila batok sa virus ug aron usab matuman ang mando ni President Ferdinand Marcos Jr. nga kinahanglan nga bakunado na ang 90% sa mga senior citizens sa matag lugar sa Pilipinas sa dili pa matapos ang  unang 100 ka adlaw sa iyang pangatungdanan.

Mao kini ang gibutyag ni Medical Officer V, Dr. Jerome Profetana atol sa labing ulahing panagtigom sa City Inter-Agency Task Force on the Management of Emerging INfectious Diseases (City IATF-MEID) ‘ning dakbayan.

Atol sa maong panagtigom, gibutyag ni Dr. Profetana nga na-identify na nila ang mga senior citizens nga wala pa nagpabakunapinaagi s panabang sa mga Barangay Health Workers ug sa mga midwives nga naka-assign sa mga Barangay Health Stations (BHS) ‘ning dakbayan.

Nunot niini, gi-awhag ni Baybay City Mayor Hon, Jose Carlos L. Cari ang mga Punong Barangay ug ang uban pang mga barangay officials nga motabang sa pag-awhag sa ilang mga ginsakupan nga magpabakuna na alang ra usab sa ilang kabulahanan.

Nasayran nga naggisge na og kampanya ngadto sa mga kabarangayan ang mga nurses nga naka-deploy sa mga kabarangayan ubos sa Department of Health Human Resources for Health (DOH-HRH) kabahin sa mga bentaha sa pagpabakuna. “Gani ang uban nga mosugot na sa pagpabakuna, ila man bakunahan dayon,” dugang pa ni Dr. Profetana.

Angayang masayran nga sa labing ulahing COVID-19 Update nga gihatag ni Dr. Profetana alang sa mga ginsakupan sa City IATF-MEID, otsenta y dos porsiyento (82%) pa gihapon sa mga senior citizens ‘ning dakbayan ang nabakunahan na. Busa, gibutyag ni Dr. Profetana nga posibleng ipahigayon na nila ang house-to-house vaccination sa mga panimalay sa nahisgotang mga senior citizens karong bulan sa Septyembre.

Sa iyang kabahin nagkanayon si City Health Officer II Dr. Norberto P. Oja nga mas dako nga hagit sa mga LVOC ang mando ni Presidente Marcos nga kinahanglan nga nakapa-booster dose na ang labing menos singkuwenta porsiyento (50%) sa mga vaccinated population sa usa ka lugar sa dili pa matapos ang unang 100 ka adlaw sa iyang katungdanan.

Busa, gibutyag ni Dr. Oja nga atol sa panagtigom sa mga City and Municipal Health Officers sa lalawigan sa Leyte, nagka-uyon sila nga  limitahan ang paglakaw-lakaw sa mga katawhan nga walay booster dose. Kini nagpasabot nga dili na makasulod sa mga government offices, mga establisimiyento ug uban pang mga sarado nga mga lugar ang mga katawhan nga wala pay booster dose. Hinuon matud pa niya nga  magkinahanglan pa kini og usa ka Executive Order sa dili pa hingpit nga ikapatuman.

Nunot niini, nagkanayon si Mayor Cari nga kinahanglan nga mas palapdan pa sa LVOC, uban sa City Administrator’s Office ug sa City Information Office, ang kampanya niini kabahin sa importansiya sa booster shot. Kini aron kalikayan ang pagpatuman og bag-ong Executive Order nga mohatag og limitasyon sa mga Baybayanon nga wala pay booster shot.

Si City Local Government Operations Officer Ms. Juvy Pedrera, sa iyang kabahin, nagkanayon nga dugay ‘nang giluwatan sa Department of the Interior and Local Government (DILG) ang usa ka advisory nga nagmando sa mga Punong Barangay nga magsumite ngadto sa buhatan sa DILG sa ilang monthly report kabahin sa limitasyon sa paglakaw-lakaw sa mga residente sa barangay nga wala pay bakuna. (Marissa M. Cano, City Information Officer, Baybay City, Leyte)

###

Otsenta y otso (88) ka mga rehistrado nga mga Civil Society Organizations (CSOs) sa dakbayan sa Baybay ang nagtigom karong adlawa (Agosto 30, 2022) sa Baybay City Gym. Kini aron hisgotan ang kabahin sa CSO accreditation.

Atol sa iyang pagpakigpukong gipasabot ni Sangguniang Panlungsod (SP) Member Hon. Ramon Ronald Veloso nga ugmang adlawa (Agosto 31, 2022) unta ang katapusang adlaw sa pagpa-accredit sa mga CSOs aron mahilakip unya sila sa tukuron nga People’s Council sunod bulan.

Apan gumikan kay aduna may mga kakulangan ang accreditation documents nga gisumite sa pipila ka mga CSOs ngadto sa ilang buhatan hinungdan nga nagka-uyon silang SP Members Hon. Veloso, Hon. Romulo Alcala, ug Hon. Dominic Junie Murillo nga tagsa-tagsaon sa pag-interview ang mga Presidente sa nahisgotang mga CSOs.

Atol sa iyang pagpakigpulong, gibutyag ni Hon. Alcala ang pamaagi sa accreditation nga gipatuman sa Committee on Cooperative, Peoples Organization, Non-Government Organization (NGOs) and Associations sa Sanggunaing Panlungsod (SP) ‘ning dakbayan. Samtang, gibatbat usab ni Ms. Linda Odicta, Multi-sectoral Sector In-Charge sa City Agriculkture Office (CAO) ‘ning dakbayan ang mga requirements for accreditation segun sa guidelines nga giluwatan sa Department of the Interior and Local Government (DILG).

Sa iyang kabahin, gipasabot ni Hon. Dominic Murillo nga importante nga ma-accredit ang usa ka CSO aron mahimo silang miyembro sa City Development Council (CDC) ug mahingpit ang ilang pagpakiglambigit sa local governance, ilabi na gayud sa pag-approve sa Annual Investment Program (AIP) sa Lokal nga Kagamhanan, ingon man usab sa pag-implementar na niini ngadto sa ilang tagsa-tagsa ka barangay. Gawas pa niini, aduna ‘say balaod nga naglatid sa gidaghanon sa mga CSOs nga angayan nga mahimong miyembro sa CDC sa matag siyudad o munisipyo. (Marissa M. Cano, City Information Officer, Baybay City, Leyte)

###

Adunay daghang klase sa hustisya apan dinhi sa dakbayan sa Baybay, giisip nga hustisya ang pagpabilin sa kalinaw, kahapsay ug kalambo-an. Justice is freedom from poverty.

Mao kini ang gipalanog ni City Administrator Atty. Florante Cayunda Jr. atol sa 16^th Commemoration of the Inopacan Massacre Discovery and Exhumation nga gipahigayon sa Veteran’s Plaza kagahapon (Agosto 28, 2022).

Nunot niini, nagkanayon si City Vice Mayor Atty. Ernesto M. Butawan nga sukad niadto hangtud karon, naningkamot ang gobyerno nga dili na mobalik ang mga problema nga nahi-aguman sa mga survivors niadtong panahona. “Gani, sa paglingkod ni Mayor Boying (Hon. Jose Carlos L. Cari) kaniadtong 2019, unang higayon nga atong gihisgotan ang mga programa nga pwede natong ihatag sa mga pamilya sa nahibilin sa mga biktima sa Inopacan Massacre.

“Kini tungod kay sukad niadtong nakaplagan kining mga bukog sa atong mga minahal sa kinabuhi daghan ang mga programa nga gihatag sa mga rebel returnees (RRs). Ug nakita namo ni Mayor Boying nga kon pwedeng tagaan og programa ang mga RRs, nganong dili man pud nato tagaan ang pamilya sa mga biktima. Mao nga ang atong konseho migahin og pondo para sa livelihood program sa mga pamilya nga apektado kay ang ilang mga minahal sa kinabuhi apil man niadtong na-massacre,” dugang pa ni Vice Mayor Butawan.

Nunot niini, sa ngalan sa mga pamilya sa mga biktima sa Inopacan Massacre, mapasalamaton silang Camela Amadora sa Barangay Ampihanon ug Marcelina Tronoyba sa Barangay Monterico gumikan sa gihatag nga suporta kanila dili lang sa mga kasundaluhan kon dili lakip na usab sa Lokal nga Kagamhanan sa dakbayan sa Baybay pinaagi sa livelihood package nga ilang nadawat.

Sa iyang kabahin nagkanayon si 802^nd Infantry Brigade Commander COL NOEL A VISTUIR nga paninguhaon nato ga matapos na ang lima ka dekada nga armed conflict sa nasud aron hingpit na nga makab-ot ang kalinaw, kahapsay, ug kalambo-an nga atong gipangandoy alang sa atong umaabot nga mga henerasyon. “Ug dili na gayud kita motugot nga mahitabo pag-usab ang Inopacan Massacre sa bisan asa nga parte sa atong nasud,” dugang pa ni COL. VESTUIR.

Samtang, gidasunan ni Mayor Rogelio D. Pua Jr. ang gisulti ni COL VESTUIR kinsa nagkanayon nga, “Ilabi na sa umaabot nga henerasyon, atong ipahinumdom kanila nga dili na kita mo-apil niining maong mga kalihoka aron dili mawala ang kalinaw ngna ato nang natagamtaman karon.”

Human sa maong programa, misunod gilayon ang Press Conference nga gipahigayon sa City Auditorium sa Legislative Building ‘ning dakbayan.

Angayang masayran nga gisugdan ang 16^th Commemoration of the Inopacan Massacre Discovery and Exhumation sa Bike for Peace gikan sa Inopacan Leyte ug sa Holy Mass sa Immaculate Conception Parish Church nga gi-celebrate ni Rev. Fr. Samuel P. Papa, sa Peace Rally nga gisalmutan sa mga pamilya sa biktima sa Inopacan Massacre ug sa mga  ginsakopan sa Integrated Peace and Development Workers Association sa dakbayan sa Baybay, ug sa paghalad og mga bulak ug sa pagdagkot og kandila sa Inopacan Massacre Marker. (Marissa M. Cano, City Information Officer, Baybay City, Leyte)

###

Sugdan na karong Lunes (Agosto 29, 2022) ang pagtukod sa dugang traynta y dos (32) ka mga temporary housing units didto sa Barangay Maganhan ‘ning dakbayan sa Baybay alang sa mga survivors sa bagyong Agaton sa Barangay Kantagnos ‘ning dakbayan.

Mao kini ang gibutyag ni City Disaster Risk Reduction and Management Officer Engr. Rhyse Austero kinsa nagkanayon usab nga 32 nalang inay mga cuarenta (40) ka mga temporary housing units ang mahimo sa Phase II sa nahisgotang proyekto gumikan sa pagsaka sa presyo sa mga construction materials.

Hinuon, gibutyag ni Engr. Austero nga adunay ipahigayon nga kausaban sa design sa tukuron nga mga balay diha sa Barangay Maganhan segun sa rekomendasyon ni Engr. Angelita Catorce-Obidiencia sa Department of Public Works and Highways (DPWH).

Gibutyag usab ni Engr. Austero nga atol sa labing ulahing panagtigom tali ni Baybay City Mayor Hon. Jose Carlos L. Cari ug sa mga tinugyanan sa Office of Civil Defense (OCD), nga gipangulohan ni OCD 8 Regional Director Lord Byron Torrecarion, gibutyag ni RD Torrecareon nga approved na ang gi-request ni Mayor Cari nga dugang 72 ka mga temporary housing units gikan sa OCD alang sa Phase III niining maong proyekto.

Matud pa ni Mayor Cari nga dako kaayo ang ikatabang niining maong additional temporary shelters gikan sa OCD aron makapahiluna na ang mga molupyo sa Barangay Kantagnos ug mahibalik na usab unya sa Department of Education (DepEd) ang mga building nga ilang gipuy-an karon.

Nunot niini, subling gipasalamatan ni Mayor Cari ang mga kawani sa Baybay City Division, nga gipangulohan ni Schools Division Superintendent Dr. Carmelino P. Bernadas, gumikan sa ilang padayon nga pagdawat sa mga Baybayanon nga nawad-an og kapuy-an gumikan sa bagyong Agaton ug temporaryong nagpuyo sa ilang mga lawak-tunghaan.

Kahinumdoman nga sa dihang gipahigayon ang Turnover of the Temporary Shelters for the Typhoon Agaton-affected Families kaniadtong Hulyo 15, 2022, nagkanayon si OCD Administrator Undersecretary Ricardo B. Jalad nga samtang aduna pay pondo, ato kining ihatag aron makabaton og pinuy-anan ug mamenosan ang kalisod nga gibati sa mga survivors sa bagyong Agaton. (Marissa M. Cano, City Information Officer, Baybay City, Leyte)

###

On August 25, 2022, representatives of the SANFORD Marketing Corporation met with Atty. Ernesto Butawan, City Vice Mayor, at the Baybay Gymnasium VIP Lounge to formally introduce their products and services in preparation for their store opening hopefully this year, 2022.

It has been a month since SANFORD sent a team from their Human Resource and Management Office (HRMO) to Baybay City to conduct on-the-spot interviews for interested Baybayanon applicants. The activity served as an opportunity for Baybayanons to find work and, hopefully, earn so that they may be able to provide for their families.

Vice Mayor Butawan, in his meeting with the representatives from SANFORD, introduced Baybay City as a growing economic hub in the province. He also talked about the different products locally produced in Baybay City, such as vacuum-fried jackfruit, sweet potato chips, and the like. His introduction of the city’s local products led SANFORD to suggest they may include locally produced goods in their SM Market.

While the ptopose building is still under construction, SANFORD hopes to open its store to Baybayanons before 2023. As Baybay will have a month-long celebration of its town fiesta, SANFORD anticipates incorporating its store activities with the city’s month-long city fiesta celebration.

Gilunsad kagahapon (Agotso 24, 2022) ang Baybay City Service Desk Office sa Government Service Insurance System (GSIS) nga anaa mahimutang sa Human Resources Management Office (HRMO, sa second floor sa daan nga Baybay City Hall.

Mao kini ang gibutyag ni City Administrator Atty. Florante A. Caryubda Jr. kinsa mao ang nagprepresentar ni Baybay City Mayor Hon. Jose Carlos L. Cari.

Nasayran nga matag ikaduhang Martes sa matag bulan muanhi sa dakbayan sa Baybay ang Desk Officer gikan sa GSIS Maasin City Branch ug mo-entertain siya sa mga GSIS members gikan sa alas otso sa abuntag hangtud sa ala singko sa hapon.

Nasayran usab nga mo-entertain ang nahisgotang Desk Officer sa mga concerns nga ipadangat sa tanan nga mga GSIS members dili lang gikan sa dakbayan sa Baybay kon dili lakip na usab sa ubang mga lugar.

Pinaagi niini, dili na kinahanglan nga muadto pa sa Maasin City ang mga GSIS Members ug maghulat nalang sa schedule sa pag-anhi sa nahgisgotang GSIS Desk Officer.

Angayang masayran nga si Maasin City Branch GSIS Manager Ms. Marilyn S. Avelino mismo ang mianhi sa gipahigayon nga launching kagahapon ug miputol sa ribbon uban nilang Atty. Cayunda, HRMO Marianito Gorgonio, City Accountant Jay Austero, City Assessor Gina Taboada ug City Treasurer Alberta Manatad. (Marissa M. Cano, City Information Officer, Baybay City, Leyte)

###

Gibutyag ni City Health Office (CHO)Surveillance In-Charge, Nurse Kristine Shayne Abarquez Castos dinhi sa dakbayan sa Baybay nga kagahapon (Agosto 22, 2022, 1:27 sa hapon) usa (1) ang natala nga confirmed COVID-19 case sa dakbayan sa Baybay. Apan katorse (14) ang probable COVID-19 case o mga Baybayanon nga mipakita og timailhan sa sakit nga COVID-19 apan wala pay confirmation pinaagi sa RT-PCR Test.

Niining maong gidaghanon upat (4) ang below 5 years old hinungdan nga dili pa pwedeng mabakunahan, usa (1) ang teenager (19 years old) nga dili bakunado, upat (4) ang adults nga pulos balunado, ug unom (6) ang senior citizen diin upat (4) kanila ang bakunado ug duha (2) ang dili.

Tungod niini, gi-awhag ni Baybay City Mayor Hon. Jose Carlos L. Cari ang mga Baybayanon nga pwedeng mabakunahan sa pagpabakuna na sa labing dali nga panahon. Kini tungod kay sa ila man magkuha og proteksiyon batok sa COVID-19 ang ilang mga sakop sa pamilya nga dili pwedeng mabakunahan, ilabi na ang mga kabataan nga below 5 years old.

Atol sa City Inter-Agency Task Force on the Management of Emerging Infectious Diseases (City IATF-MEID) meeting kagahapon, gibutyag ni Nurse Refie Artajo sa CHO ‘ning dakbayan nga gilunsad sa Local Vaccination Operation Center (LVOC) ang PINASLAKAS atol sa ikawalo nga semana sa ramp-up vaccination. Ubos sa PINASLAKAS Ramp-up Vaccination, nagpahiluna og duha (2) ka mga Vaccination Posts ang LVOC kagahapon ug karon didto sa Baybay City Terminal ug sa Prince Mall Baybay. Ugma (Agosto 24, 2022) didto sa CHO ipahigayon ang ram-up vaccination, samtang sa Baybay City Gym ipahigayon ang Ram-up Vaccination sa Huwebes (August 25, 2022) ug sa Biyernes (August 26, 2022).

Matud pa ni Nurse Artajo nga tumong sa LVOC nga makab-ot ang Presidential Directive nga 90% coverage for senior citizens ug ang 50% coverage of first booster shot hinungdan nga ilang gidugangan ang mga Vaccination Posts.

Gibutyag usab niya nga aduna nay listahan ang LVOC sa mga senior citizens nga dili pa bakunado hinungdan nga nagplano sila nga mag-house-to-house vaccination aron pagseguro nga mabakunahan gayud ang mga senior citizens nga eligible for vaccination.

Sa katapusan, subling nagpahinumdom si Mayor Cari nga dili gayud mokumpiyansa ang mga Baybayanon ug magsul-ob gayud og face mask sa kanaunay ilabi na kon anaa sa mga publikong lugar. Iya usab nga gimando-an si Chief of Police, PLTCOL JOEMEN COLLADO nga subling hugtan ang implemetasyon sa City Ordinance #25, Series of 2020 nga nagmando sa pagsul-ob og face mask sa mga publikong lugar aron kalikayan ang multa nga usa ka libo ka pesos (P1,000.00) o pagkapriso nga dili molapas sa unom (6) ka bulan. (Marissa M. Cano, City Information Officer, Baybay City, Leyte)

###

Pinaka-ubos ang gidaghanon sa mga drug-affected barangays dinhi sa Rehiyon Otso.  Mao kini ang gibutyag ni Philippine Drug Enforcement Agency (PDEA) Region 8 Regional Director Edgar T. Jubay atol sa gipahigayon nga labing una nga film showing sa Buy-bust Queen, usa ka anti-illegal drugs advocacy film nga gi-produce ni Film Director Jr Olinares ubos sa Pinoyflix uban sa PDEA.

Matud pa ni Director Jubay nga sa 2,900 ka mga drug-affected barangays dinhi sa Rehiyon Otso, 206 nalang ang nagpabilin pa nga drug-affected apan nanganti siya nga ilang i-clear ang nahigsotang mga barangay sa dili pa matapos ang tuig 2022.

Hinuon, matud pa niya nga samtang ilang gi-clear ang mga affected barangays, kinahanglan nga magpabilin usab nga drug-cleared ang 2,694, ilabi na ang mga unaffected barangays sa matag lugar dinhi sa Rehiyon Otso. Tungod niini, gikinahanglan ang malahutayon nga adbokasiya batok sa iligal nga druga ug magamit sa maong katuyu-an ang Buy-bust Queen Movie. Gumikan kini kay makita sa maong salida ang sakripisyo nga gihimo sa mga law enforcement agencies aron lang mapakgang ang iligal nga druga sa nasud, ingon man usab kon unsa ang mahimong dangatan sa mga tawo nga mosulod niining maong bisyo.

Gibutyag usab ni Director Jubay nga gumikan sa gipakita nga suporta sa Baybay City LGU sa mga kalihokan sa PDEA batok sa iligal nga druga, mas nadasig sila aron mas hugtan pa ang ilang gihimo nga paggukod sa mga migamit ug namaligya og iligal nga druga dinhi sa Rehiyon Otso.

Sa kabahin sa Baybay City LGU, gibutyag ni Vice Mayor Atty. Ernesto M. Butawan nga kanunay gayud nga nagsuporta ang Baybay City LGU sa kampanya batok sa iligal nga druga, “Dili magpanuko ang atong gobyerno sa paggukod sa mga kriminal apan aduna usab kita’y gobyerno nga andam nga motabang sa mga gusto nang mobalik sa sabakan sa atong komunidad hinungdan nga aduna kita’y Balay Silangan.” Hinuon, matud pa ni Vice Mayor Butawan nga gikinahanglan ang hiniusang pwersa, dili lang sa mga law enforcement agencies ug sa gobyerno kon dili lakip na sa katilingban, sa mga ginikanan, ilabi na sa mga kabataan, aron hingpit nang mawala ang iligal nga druga sa atong tagsa-tagsa ka mga komunidad.

Sa laing bahin, malaomon si Direk Jr Olinares nga i-promote sa mga kabataan ang Buy-bust Queen aron mas daghan ang makakita niini ug maka-amgo nga dili sila angayan nga mosulod niining maong bisyo. Iya usab nga gidasig ang mga Baybayanons nga i-like ang PinoyFlix aron sila makakita og mga salida nga libre, sama sa Buy-bust Queen. (Marissa M. Cano, City Information Officer, Baybay City, Leyte)

###

Gipresentar ni Baybay City Mayor Hon. Jose Carlos L. Cari atol sa City Development Council (CDC) Meeting kaniadtong Enero 19, 2022 ang mga priority projects sa dakbayan sa Baybay nga wala pay tataw nga pondo ug lakip niini ang Blood Bank with additional functions (testing and screening).

Matud pa ni Mayor Cari nga kinahanglan ilakip kini sa Annual Investment Program (AIP) sa dakbayan sa Baybay, ug i-certify sa CDC nga urgent program kini nga programa sa dakbayan aron kon adunay makita nga pondo gikan sa national government, sa provincial government, o sa panudlanan mismo sa Lokal nga Kagamhanan sa dakbayan sa Baybay, ready na ang mga dokumento nga gikinahanglan alang sa implementasyon niini sama sa program of work ug uban pa.

Angayang masayran nga dugay nang nagplano ang dakbayan sa Baybay nga magtukod og kaugalingon nga Blood Bank aron dili na kinahanglan nga moadto pa sa Red Cross Ormoc ang mga Baybayanon ug molinya og dugay didto aron lang makakuha og dugo nga ilang gikinahanglan. Apan gumikan kay aduna may mga pamalaod ang Department of Health (DOH), nga adunay kalambigitan sa pagtukod og Blood Bank, padayon pa kining gipangitaan og pamaagi karon sa Baybay City Local Blood Council (BCLBC).

Matud pa ni City Health Officer II Dr. Norberto P. Oja nga segun pa sa DOH, kinahanglan nga anaa sulod sa ospital ang Blood Bank. Samtang, atol sa gipahigayon nga  BCLBC Meeting kagahapon (Agosto 16, 2022), gipresentar na ni Territory Manager sa Zeolite Diagnostics Supplies, Mr. Lester Gonzaga ang iyang mga proposed equipment alang sa nahisgotang Blood Bank.  Hinuon, matud pa sa BCLBC nga kinahanglan nga lakip na sa iyang presentation ang presyo sa matag usa nga equipment aron magiyahan ang Baybay City LGU kon pila gayud ang gikinahanglan nga pondo alang sa pagpalit niini.

Sa iyang kabahin nagkanayon si Sangguniang Panlungsod Member ug Chair sa SP Committee on Health, Dr. Fulton Ike Arradaza nga mas maayo kon madali ang pagtukod sa nahisgotang Blood Bank aron aduna na unya’y kabutangan sa dugo sa mga Baybayanon nga mo-apil sa mga Bloodletting Activity nga pasiugdahan sa BCLBC. Pinaagi niini, dili na madala pa sa laing lugar ang nahisgotang dugo ug magamit gilayon kini sa mga Baybayanon nga magkinahanglan niini. (Marissa M. Cano, City Information Officer, Baybay City, Leyte)

###

Usa sa mga tugon ni Baybay City Mayor Hon. Jose Carlos L. Cari ngadto nilang Barangay Kantagnos Punong Barangay Hon. Micehlle D. Cipe ug Barangay Maganhan Punong Barangay Hon. Renato P. Magan mao nga ipa-ubos sa Training on Fire Prevention and Fire Suppression ang mga molupyo sa Temporary Shelter sa Barangay Maganhan ‘ning dakbayan.  Kini aron pagseguro nga kalikayan ang sunog sa nahisgotang lugar.

Nunot niini gipahigayon kagahapon (Agosto 15, 2022) ang Training on Fire Prevention and Fire Suppression uban sa mga nagpuyo na didto nga mga survivors sa Barangay Kantagnos ‘ning dakbayan.

Gipasiugdahan kini sa mga ginsakupan sa City Disaster Risk Reduction and Management Office (CDRRMO) nga gipangulohan ni Engr. Rhyse Austero ug sa Bureau of Fire Protection (BFP) dinhi sa dakbayan sa Baybay nga gipangulohan ni SINSP FERNANDO MANDIA.

Angayang masayran nga mibalhin na sa Temporary Shelter sa Barangay Maganhan ‘ning dakbayan ang unang cuarenta (40) ka mga surviving families sa Barangay Kantagnos.

Matud pa ni City Social Welfare and Development Officer Manuel Icon Donaire nga ilang gisunod ang criteria gikan sa Department of Social Welfare and Development Office Region 8 (DSWD RO 8) sa pagpili sa unang cuarenta (40) ka mga pamilya nga nagpuyo sa Baybay City Senior High School. Gilangkoban kini sa mga pamilya nga adunay senior citizens, persons with disability, ug mga nagsabak tungod kay mas vulnerable sila sa mga balati-an.

Ang lain nga mando ni Mayor Cari kanila mao ang paghipos sa ilang mga basura aron dili kini mahimong hinungdan sa sakit nga adunay kalambigitan sa panglawas. (Marissa M. Cano, City Information Officer, Baybay City, Leyte)

###